WILLEMSTAD.- Curaçao Clean Up ta hasi un apelashon serio tur bishitante di ‘Fuikdag’ pa bai ku kùp duradero i saku di shushi. Djadumingu 4 di yanüari awor, ta Fuikdag. Preparashon a kuminsá kaba pa un dia di goso i alegria. Un aktividat ku a bira un kustumber di tur aña, riba e promé djadumingu di aña.
Curaçao Clean Up pa hopi aña ta enbolbí, i semper ta keda konsientisá riba limpiesa durante e aktividat. A risibí koperashon di diferente organisashon i boluntario. Tambe a introdusí algun método pa mas tantu posibel laga e playa i laman limpi. E aña aki atrobe lo tin un kònteiner pa tira shushi na e playa di Fuik.
Mester menshoná si, ku último 2 aña, e shushedat a bira ménos, un señal ku e públiko ta birando mas konsiente.
Sinembargo un apelashon serio na tur bishitante di ‘Fuikdag’ pa por sigui tene kuenta ku mester kuida nos laman i playa riba e dia ei. Ban gosa di Fuikdag sin laga shushi atras.
“Kòrda bai ku bo kùp duradero o ‘tumbler’ i tambe saku di shushi pa tira den e kònteiner disponibel na e playa. Òf bai ku bo saku ku shushi pa tira den bo kliko na kas. Evitá mas tantu posibel pa brel di solo, kùp, bòter o bleki òf otro ophetonan kai den laman”.
Curaçao Cleanup ta deseá tur bishitante di e dia aki hopi goso i alegria pero tambe ta konta ku un komportashon responsabel pa ku nos playa i medio ambiente.
