E neurosiruhano Leopoldo Luque, e sospechoso prinsipal relashoná ku morto di Maradona, na momentu di yega na korte.
SAN ISIDRO, Argentina.- E kaso penal ku ta buska pa determiná esnan responsabel pa morto di Diego Maradona ayera a drenta den un disputa nobo entre esnan akusá, ku tur tirando falta riba otro i akusando otro pa e atenshon médiko defisiente ku e ídolo di futbòl a risibí. E tribunal den San Isidro, den nort di Buenos Aires, for di aprel a bin ta eksaminá si e kondishonnan tabata adekuá pa Maradona a keda interná na kas despues di a hasi un operashon na kabes. E leyenda di futbòl a muri di un atake di kurason i problema ku pulmon den 2020 na edat di 60 aña.
“Nan ta akusá mi riba puntonan ku ami no a atendé. Kon mi por a keda sin hasi algu ku nan no a pidi mi?”, segun pregunta dje koordinadó médiko den e kaso, Nancy Corlini, ku ta un dje shete profeshonalnan médiko akusá den e kaso.
Akusá di no a sòru pa e remedi i personal nesesario, Forlini a referí na e sikiater Agustina Cosachov i e neurosiruhano Leopoldo Luque, ámbos akusá den e kaso: “Agustina a bisa ku tur desishon ta pasa via nan, ku ta nan tin e poder”.
E profeshonalnan ta keda akusá di homisidio mediante desishon ku nan a tuma sabiendo ku esei por a kousa morto di e kapitan di selekshon argentino kampion Mundial 1986.
Luque, presentá komo e dòkter ku a trata Maradona, a nenga di a kontrolá e sitio kaminda e astro di futbòl a keda interná i a referí na Forlini. “E tabata hasi e komunikashonnan, pero no ku ami. Ami tabata hasi e parti neurosirugia, pero no tabata e dòkter pa trata e pashènt”, el a remarká. Luque a insistí ku su partisipashon tabata e parti di neurosirugia na kua a someté Maradona dia 3 di novèmber di 2020, 22 dia promé ku el a muri, i a referí e parti di kontròl klíniko na Pedro Di Spagna, kende tambe ta keda akusá.
Di su parti, Di Spagna a nenga di tabata e dòkter klíniko i a splika ku ni sikiera e por a yega serka e pashènt e último dos biahanan ku el a purba na evaluá su kondishon. “Mi tabata rabiá pa motibu di no por a hasi mi trabou, i nan a bisa mi pa bai”, segun Di Spagna ta kòrda riba un bishita ku el a hasi dia 18 di novèmber na e kas den Tigre, kaminda Maradona a keda despues di a hasi un operashon kompliká.
Tur esnan akusá ta reklamá nan inosensia, kontra di un akusashon ku tin kastigu te ku 25 aña di prizòn.
E fiskalnan lo hiba palabra kuminsando dia 8 di òktober durante di seis diferente seshon.
