Arsobispu di Toronto, kardinal Frank Leo (r) i kardinal John Atcherley Dew di New Zealand bandonando e reunion di kongregashon di Vatikano.
SIUDAT DI VATIKANO.- E 133 kardinalnan ku derechi di voto ya a yega Roma pa eligí e susesor di Papa Francisco i definí e futuro dje iglesia di 1.400 mion katóliko.
Esnan yamá “e prensnan di iglesia” kuminsando djárason awor lo sera nan mes den Kapia Sixtina pa eligí e pontífise nobo den un votashon pa kua no tin faborito.
Progresista, konservador, dogmátiko… Kon e próksimo Papa lo ta? Tin konsenso ku lo e no ta un revolushonario manera e argentino Jorge Bergoglio, ku a traha riba un pontifikado di reformanan, ku enfoke riba pobernan i problemanan di mundu, i ku a enfrentá resistensia den Iglesia Katóliko.
“Un pastor yegá na e bida real di hende”, segun un minuta di e reunion di kardinalnan djaluna último. “E mester ta presente, mas serka, kapas di ta un brùg i un guia”.
E enkuentronan aki a bin ta tuma lugá tur dia for di despues ku Papa Francisco a fayesé dos siman pasá. Den e enkuentronan ei tabata kompartí puntonan di bista riba prioridatnan di Iglesia riba kaminda pa e konklaf.
Ku representante di 70 pais, lo e bira esun mas internashonal di historia. Francisco a krea e mayoria di kardinalnan ku awor ta vota pa su susesor, ku hopi di nan yegando for di tur parti di mundu, leu di Europa i histórikamente marginá pa e Iglesia den Roma.
“Loke mi ta hasi ta di mira, skucha, mira hende ku ta bini di Mongolia, ku ta traha na Curia, ku ta huntu ku pobernan den Amerika Latina, den Afrika, ta algu bunita”, segun e kardinal chileno Fernando Chomali.
E bosero di Vatikano, Matteo Bruni, a informá djaluna ku tur esnan ku mester vota ya ta na Italia pa vota tras di porta será den Kapia Sixtina kuminsando djárason atardi te ora ku un kandidato haña un mayoria di dos tèrsio.
Huma pretu lo anunsiá na momento ku no tin konsenso i ku lo mester bin un otro votashon. E huma blanku ta, “Habemus papam”.
Sin komunikashon
Henter e personal ouksiliar na e seremonia ayera a hura di lo tene sekreto, for di saserdote i religioso, te na dòkternan, enfermeronan, miembronan di seguridat, shofùrnan i personal di limpiesa.
Vatikano ayera a anunsiá ku lo kòrta señal di telefòn den e siudat chikitu, miéntras ku e konklaf ta andando.
E kardinalnan ku ta vota lo no tin kontakto ku mundu eksterior te ora eligí un Papa nobo. Ademas di telefòn, tampoko nan lo tin akseso na internèt ni na prensa, tampoko televishon.
Lo realisá kuater votashon pa dia, ku eksepshon dje promé dia ora ku por pronunsiá un biaha so. Tur papel i akta lo wòrdu kimá pa anunsiá e resultado.
Benedikto XVI a keda eligí den kuater votashon den 2004; Francisco den 2013, den sinku. Den tur dos kaso e konklaf a dura dos dia.
Kardinal di Zùit Sudan, Stephen Ameyu Martin Mulla ku tambe ta presente pa e elekshon di un Papa nobo.
