Ku 24 aña Marc Anthony Jordi Pengel tin su master den “Fashion Design”. El a studia na universidat di Bèlgika i awor e ta kla pa su mes liña di diseño Marc Martha. Den entrevista ku Djasabra el a konta ku for tempu e tabata chikí, tur dia e ta pinta i e kier a hasi algu ku bo mester di bo inteligensia i alabes kreatividat pa hasi loke bo imaginá i asina el a bai den direkshon di Fashion pasobra esei ta kombiná tur e kosnan ku el a gusta esta inteligensia kaminda bo ta pensa hopi i tambe e por keda pinta. “Tur kos ku bo imaginá ta bira realidat i esei mi a gusta di Fashion Design”, Marc Anthony a konta Djasabra.

 

Studia na Bèlgika

Marc a nase na Kòrsou pero ku un aña a bai biba Hulanda. Apesar di a biba na Hulanda for di su promé aña di bida, Marc ta dominá su papiamentu hopi bon. E ta bisa ku nunka bo tin di lubidá bo mes pais i e papiamentu ta bo idioma i bo mester keda kuné. Despues di su estudio básiko el a drenta e akademia di Royal Academy of Fine Arts Antwerp. Ta trata di e skol di mas mihó pa studia “fashion design” na dje. Tabata un estudio hopi duru pasobra nan ta push bo pa bo bai mas dilanti i mas profundo den investigashon i diseño. Einan Marc a haña su bachelor i despues su master.

Siensia, fashion i arte

“Fashion Design” ta hopi diversifiká. Pa Marc ora e ta diseñá e ta kuminsá ku un inspirashon. E ta wak tur loke e ta mira rondó di dje i tambe e ta lesa hopi buki. Su kolekshon último el a kombiná siensia i e fashion i arte. I pa esei el a hasi un investigashon tur kaminda, pa despues e pinta, skohe e telanan di paña i traha e paña. E por hasi hopi kos. I den e tempu aktual di e pandemia di Corona, tin “photoshoot”, pelíkulanan ku por traha, loke ta nifiká ku por hasi tur kos.

 

Diseñá i kose

Ku un sonrisa riba su kara kontestando nos pregunta si e ta diseñá i kose alabes, Marc a bisa “mi por kose tambe i mi ta hasié tambe pero mi tambe ta traha ku un tim rondó di mi ku ta hopi bon. Esei mi gusta pasobra Fashion Design ta diversifiká kaminda  mi ta hasi mi kos i pa despues kose sea mi mes òf ku mi tim”.

 

Premio

Marc a partisipá na diferente sho di moda. Bèlgika ta den Oropa i ta djis pega ku Paris ku ta e siudat di moda. El a konta nos ku el a hasi hopi sho na Bèlgika mes. El a hasi sho na Brussels, Antwerp i tambe el a hasi sho na Barcelona Spaña. Marc tabata den final di un premio na Barcelona tambe. Mas aleu el a gana premio na Bèlgika mes pa diseño i moda.

Ménos sho i mas kreatividat

Moda i diseño ta kambia konstantemente, i esei ta algu duru pasobra komo e artista tras di e moda e tin di keda na altura konstantemente. Tambe e tin di adaptá su mes konstantemente ounke ta algu masha agradabel. E ta mira awor aki ku tur hende den moda ke bai mas poko poko pasobra normal e ta hasi 4 shou den un aña pero esei a bira hopi. Tur e diseñadónan ke bai bek na básiko i hasi un òf dos sho pa aña pa asina nan por ta mas kreativo. Dor di hasi hopi sho den un aña e diseñadó ta haña ménos tempu pa hasi su investigashon i purba kos nobo. I p’esei a disidí di baha e kantidat di shonan pa aña.

 

 

Moda awor

Kiko ta e moda aktualmente. Marc a konta Djasabra ku algu masha agradabel awor aki ta ku hendenan ta bai bek na nan “roots”. Por mira hopi diseño afrikano, karibense, asiátiko i nan ta tradusí esaki den pañanan nobo. I esei ta algu Marc a gusta masha. Tumando na kuenta Kòrsou i nos pasado tradusí esaki den moda, Marc a bisa ku Kòrsou ta den bon posishon. Aki tin herensia grandi, tin un herensia afrikano i oropeo tambe. I  e kombinashon di e dosnan ei ta algu úniko na Kòrsou. Tur esei por keda tradusí den paña i masha interesante. I na Kòrsou tin un balor agregá ku den Karibe ta aki so tiné. I esei ta algu nobo den moda. Na Kòrsou por mira hende ku ora algu daña nan ta traha algu otro di dje, esei ta importante den moda tambe.

E persona ku ta diseñá pe

Na momentu ku ta diseñá paña, Marc a bisa ku tin di tene kuenta ku e persona su kurpa, e persona su kolo, su kabei etc etc. Tur eseinan ta importante pa kòrda kiko ta diseñá pa un persona. Kada persona ta diferente i e diseño di mas mihó ta ora e persona ta sintié konfortabel, i por mira na e persona su kara i bo ta mir’é ta bria den e paña. I esei ta hasi e moda mas nechi. Promé kos ku mester pensa ta ki persona bo ta diseñá pe.

 

Bèrdè i oraño

Kolo tambe ta kambia segun tempu ta bai. Tur temporada tin otro kolo ku e diseñadónan ke usa. Awor aki kolo briante pasobra nos tabata den un periodo malu i nan ke kolo ku ta mustra speransa. Purba pa tin un mensahe positivo ku e diseño. E kolonan ku Marc a menshoná ta bèrdè i oraño ta e kolonan ku ta den moda aktualmente. Marc ta haña ku Kòrsou ta un ehèmpel kon ta usa kolo. Kòrsou sa kon mester kombiná e kolo den kas, den práktikamente tur kos.  Kòrsou mester ta e ehèmpel kon Oropa mester usa kolo. Na Oropa tur kos ta poko shinishi pasobra nan no tin e kolonan rondó di nan i p’esei nan no sa kon pa kombiná e kolonan ei.

 

Marc Martha brand

Marc aktualmente ta traha pa su mes marka. Su marka ta Marc Martha. E Martha ta e ‘meisjesnaam’ di su mama. Pa aki 10 aña Marc ta mira su mes ku su mes tiendanan rònt mundu. E ke plama su marka rònt mundu kaminda e ta logra plama tambe e kultura karibense kuné.

 

E pandemia a trese oportunidat

El a terminá su estudio nèt den e tempu di pandemia aki. E kos tabata laf i otro. Pero tòg a trese oportunidat pe den otro manera. El a bisa ku nan a traha un pelíkula di moda i tambe un buki ku ta na benta na Hulanda. Esei ta e oportunidat ku a presentá ku lo no a resaltá den tempu normal. Marc a bisa ku e ta kere ku e hende tin di kambia ku e temporada i esei ta pone ku bo ta push bo mes pa bai mas dilanti. Den su kaso e ta haña e periodo aki a push’é i lag’é pensa “Out òf the Box”.

 

Determiná pa logra

Mirando su mes kaminda e ta awor aki Marc a bisa ku esaki tabata su determinashon. For di chikí e kier  a logra algu ku su talento. E sa ku e ta traha duru i lo a traha duru pa loke el a logra awe. I p’esei el a bai e mihó skol kaminda nan ta pusha bu duru i ta e mihó studiantenan so ta logra na e skol ei. For di chikí e tabata determiná i a traha duru pa e logra.

 

Arte ta muchu mas ku pinta so

Teniendo na kuenta kuantu hóben últimamente ta bai den direkshon di arte i mirando e realidat ku no semper mayornan ta sostené esaki, Marc a bisa ku hopi hende no sa ku ora bo studia arte, bo ta studia mas ku pinta òf eskultura. E ta un estudio hopi amplio kaminda tin di lesa hopi i hasi hopi investigashon. E studiante ta siña kon pa lanta su mes negoshi. Studia arte ta trese mas oportunidat. Si bo no logra den e  arte mes, por hasi otro kos i loke ta bon di arte i hóbennan mes sa ku bo ta siña pa kreativo i pensa i bin ku ideanan ku bo por usa den un negoshi i traha sèn kuné tambe. Pa Marc e ta mir’é komo un estudio di mas mihó ku un hóben por hasi pasobra den dje tin tur kos. Den kaso di mayornan, Marc a bisa ku el a haña hopi sosten di esnan di dje pero den su kaso e tabata determiná tambe. I pa mayornan Marc a bisa pa nan so supestimá arte pasobra bo por logra bo biba di arte. Tin hopi hende ta traha hopi sèn kuné. “Si e ta hasi bo yu felis, laga nan hasié. I kiko bo ke ta felis i tin e oportunidat tambe pa traha bo entrada òf ta laf sinta den ofisina so i bo no ke hasié mes”, Marc a dirigí su mes prinsipalmente  na mayornan.

Show di moda na Kòrsou

Marc tin hopi plan. Su promé plan ta bai Paris i habrié un tienda einan i hasi un show di moda spontáneo. Fransia ta e kapital di moda. I Marc ta spera ku pronto e por bin ku un sho Kòrsou tambe. I idea tei i ta spera e por konkretis’é.

 

 

LAGA UN KOMENTARIO

Please enter your comment!
Please enter your name here