Un bòrchi di protesta ku imágen di presidente ruso Vladimir Putin na entrada dje kaya ku ta kondusí na Embahada Ruso den sentro di London, kaminda ku rusonan bibá na Inglatera lo por depositá na voto.
MOSKU (AFP).- E partido dje presidente ruso Vladimir Putin, Rusia Uní, ayera tabata riba kaminda pa gana un elekshon parlamentario estriktamente kontrolá i ku ayera a keda sakudí pa e atake ukraniano di mas grandi kontra di Mòsku for di inisio dje guera. Mas ku 1.600 drone a ataká e teritorio ruso den oranan di djadumingu mardugá ku tabata e di tres i último dia di elekshon, ku a kuminsá ku dos morto i un refineria di petrolio na kandela den Mòsku.
Un sondeo na boka di urna di parti di Sentro di Investigashon di Opinion Públiko di Rusia, e enkuestadó estatal; (VCIOM), a duna Rusia Uní un 49.4% di votonan, kasi e mesun resultado ku den último elekshon di 2021.
E Ministerio di Defensa ruso a akusá Ukrania di ke “stroba e boluntat demokrátiko di siudadanonan ruso” i a primintí na intensifiká su bombardeonan riba Kiev. Tabata e bombardeo di mas intenso riba Mòsku for di inisio di e guera den 2022.
Den kareda di 450 drone a keda lansá riba e kapital, segun e alkalde Seguei Sobianin, kende a referí na “un atake sin presedente”. Parti pafó dje siudat, un drone e bora un edifisio di apartamentunan i a destruí vários piso, provokando kandela. E presidente ukraniano, Volodimir Zelenski, a duna di konosé ku e atakenan di djadumingu tabatin “un impakto importante den e region di Mòsku”.
Por lo ménos dos persona a muri, segun e gobernador regional di Mòsku, Andrei Vorobiov. Ademas, 400 persona a keda evakuá debí na un kandela den un edifisio residensial.
E elekshonnan pa renobá e 450 asientonan di Duma, kámara abou ruso, tabata e promé elekshon parlamentario for di despues ku a start ku e guera ku kada bes ta mas presente den bida di siudadanonan ruso. Komo represaya pa e bombardeonan riba su siudatnan, Ukrania a oumentá su atakenan riba Rusia, yegando Ural i Siberia i kousando eskases di kombustibel debí na e atakenan riba refinerianan.
Tur e partidonan rival di Putin den elekshon ta respaldá e polítika di Putin i e operashon den Ukrania E úniko partido kontra dje guera, Yabloko, a keda ekskluí dje elekshon di parti di Tribunal Supremo.
