WILLEMSTAD.- Selekshon di Reino Ulandes pa World Baseball Classic ta kargá ku (eks) peloteronan di MLB. Reino den luna di mart 2017 pa di kuater biaha ta tuma parti na e torneo aki.
Interesante ta e echo ku e selekshon di Reino ta konta ku vários big leaguer. Manager Hensley Meulens ya kaba por konta ku Xander Bogaerts (Red Sox),
Didi Gregorius (New York Yankees), Kenley Jansen (Los Angeles Dodgers), Spencer Kieboom (Washington Nationals), Jurickson Profar (Texas Rangers), Jonathan Schoop (Baltimore Orioles) i Andrelton Simmons (Los Angeles Angels).
Simmons, Schoop, Profar, Bogaerts i Jansen tabata ku Reino den edishon 2013 di WBC i nan a yega te semi final.
Gregorius tambe den pasado a forma parti dje team di Reino. Meskos t’e kaso ku Schoop i Bogaerts, kendenan den 2011 a integrá e selekshon ku a titulá kampion mundial na Panamá.
Ademas dje aktual Major Leaguers, tin vários pelotero ku tambe a yega di figurá den MLB i ku ta riba e lista provisorio di 50 pelotero. Nan ta: Pichernan Shairon Martis (Lincoln Salt Dogs, Independent League), Jair Jurrjens (Uni-President 7-Eleven Lions, Taiwan) i Rick van den Hurk (Fukuoka Softbank Hawks, Hapon) komo tambe Wladimir ‘Coco’ Balentien (Yakult Swallows, Hapon) i Yurendell DeCaster (Tigres de Chinandega, Nicaragua).
E selekshon ta keda kompletá ku hungadónan di Minor Leagues komo tambe di kampionato di Ulanda i Alemania.
Promé ku e team biaha pa Sur Korea, manager Hensley Meulens mester kòrta den su lista di hungadónan i keda ku 28.
Reino Ulandes ta start e torneo dia 7 di mart kontra di Sur Korea. Riba 8 di mart Chinese Taipei lo ta e di dos rival i un dia despues ta sigui e wega kontra di Israel.
Si logra e promé òf di dos lugá den e grupo, Ulanda lo biaha pa Hapon pa e di dos buèlta.
E semi final i final lo ta na Los Angeles.
