WILLEMSTAD.- Curaçao Medical Center (CMC) ta konfirmá ku kapasidat kompleto pa operashon a keda restourá. E aparatonan di sterilisashon ku tabata temporalmente for di servisio awor ta funshoná. E departamentu di Planifikashon lo tuma kontakto dirèkt ku e pashèntnan ku nan operashon a keda posponé pa asina konfirmá fechanan nobo.
Na momento ku a konfrontá e problemanan tékniko, CMC a duna prioridat na operashonnan di urgensia i agudo pa nan por a sigui sin interupshon. Operashonnan elektivo (planifiká) a keda redusí temporalmente, lokual a frena e progreso den e lista di espera pa operashon. Despues di COVID-19, CMC a logra redusí e lista di espera for di mas o ménos 2,600 pashènt pa ménos ku 600. Despues di e interupshon aki, e lista di espera ta na kasi 700. Awor ku e kapasidat pa operashon a keda restourá, CMC ta spera di por redusí e lista di espera atrobe den e próksimo simannan.
Hòspital ta pidi pashèntnan pa keda pendiente di un yamada di e departamentu di Planifikashon na logá di yama, pa asina permití e personal kordiná e sitanan na un manera efisiente.
CMC ta gradesí pashèntnan i komunidat pa nan pasenshi i ta reafirmá su kompromiso na un kuido seif, kontinuo i di kalidat haltu.
