‘Tur siman 1 toká pará e ta slou e trein’

... Ludwig Isabella ‘DJ Danger’ ...

WILLEMSTAD.- Gruponan di Aguinaldo i Tambú man na kabes. E loke ‘DEN E BEMBE’ a premirá fo’i kuminsamentu dje temporada di Aguinaldo i Tambú ta e realidat di dia. E prosedura pa yega na pèrmit pa por presentá ta un ku no ta yuda pa gruponan di un forma fásil yega na un pèrmit pa presentashon.
Dia ku a tene reunion ku gruponan na Kas di Kultura no a indiká bon kla ku ke pa gruponan ‘toka paden’, pues den un lugá sera, pero awor ta resultá ku sitionan ku no tin e fasilidat pa gruponan toka paden tur ta wòrdu rechasá, pero esaki no ta keda indiká delantá si no na momentu ku bo entrega bo petishon di pèrmit, ku mester ta 5 dia di trabou delantá, i esaki ta pone ku si bo tin un sitio kaminda no por tin presentashon musikal na mes momentu bo a pèrdè un toká pe siman ei, pasó bo no por entregá petishon mas, paso bo petishon ta lat.
Pa e gruponan no ta fásil pa di un forma delantá yena nan agènda i pidi pèrmit delantá.
Mirando tur e kontratempu ayera nochi e konosido dj Danger, Ludwig Isabella, lider di grupo di Aguinaldo Los Originales a tuma e desishon di bai ‘live’ riba facebook pa dje forma ei splika e fanátikonan dje grupo kiko ta e problema, paso e grupo ta anunsiá nan agènda di presentashon pero despues mester tende di Polis ku no ta permití presentashon na ‘x’ sitio, loke ta pone ku ora e grupo kanselá e presentashon nan ta keda komo esnan ku ta basilá malu.
‘DEN E BEMBE’ a kombersá ku Isabella ayera nochi i el a indiká ku e problema ta ku na su konsepto departamento di pèrmit di Polis mester indiká delantá unda si i unda no. Kua snèk, sigur esnan popular kaminda ku durante dje último añanan tabata otorgá pèrmit, awor lo no duna pèrmit mas.
‘Ta di kuater biaha kaba ku ta ninga un pèrmit di Los Originales, anto bo no por hinka otro petishon pa pèrmit paso bo ta lat konforme nan regla di 5 dia di trabou delantá. Durante dje temporada di 2009 pa 2010, sr. Rene Rosalia a logra di baha e dianan di petishon di 3 siman pa 3 dia, 2 aña pasá a bòltu esaki hasié 5 dia, ku den práktika ta nifiká ku ta 7 dia delantá bo mester entrega bo petishon. Definitivamente ta paden so tin mag di toka, pero esaki no ta wòrdu bisá, pero e maneho si ta asina’, asina Isabella a indiká.
Komo ehèmpel e ta duna ku ta ninga pèrmit pa presentá na Toko San Jose, riba Caracasbaaiweg, ku ta un toko for di e kaya prinsipal, pero ta duna pèrmit pa presentá na Glenn Snack ku ta un snèk ku ta praktikamente riba kaya ubiká na subida di Seru di Mahuma.
‘Ta for di luna di aprel Los Originales ta kuminsá ku preparashon pa e temporada di presentashon. Bo ta hasi esfuerso tene un grupo huntu. A skohe pa hasi positivo, pero e situashon ta hopi laf. Si tur siman 1 toka para, e ta slou e trein’.
Finalmente Isabella a indiká ku no a bai ‘bibu’ riba facebook pa bringa, pero pa drecha e situashon. E ta di opinion ku un splikashon ta na su lugá. E trato por ta mihó!.

SHARE

LEAVE A REPLY