WASHINGTON, USA (AFP).- Forsa Aéreo di Merka ayera a duna di konosé ku ofisialmente nan ta konsiderá ku e ocho tripulantenan dje avion militar Osprey ku a kai algun dia pasá na Hapon, ku nan tur a muri. E avion CV-22 a kai dia 29 di novèmber serka dje isla Yakushima durante un mishon rutinario di training.
“Forsanan Armá a pasa for di un operashon di búskeda i reskate pa un búskeda i rekuperashon” di kurpanan, debí ku ta “poko probabel” ku tin sobrebibiente, segun e Komando di Operashon Spesial di Forsa Aéreo den un komunikado. Di e ocho militarnan ku tabata na bordo, a rekuperá kurpa di tres, miéntras ku kurpa di otro tres ta den proseso di reskate i dos otro ainda ta keda buská.
Osprey ku por keda usá komo helikòpter òf avion, a sufri vários aksidente mortal den último añanan. Na fin di ougùstùs, tres sòldá di Marina merikano a muri den un aksidente ku Osprey den nort di Australia.
Aña pasá, kuater merikano a muri na Noruega na bordo di un avion dje tipo aki durante ehersisionan di OTAN.
