Aruba a yega di 9 morto den tráfiko
ORANJESTAD.-Djabièrnè anochi pa mas o ménos 7:11 sentral di polis a haña notifikashon di un aksidente serio ku a tuma lugá na altura di Citgo Savaneta. E promé informashon ku a drenta ta indiká ku un outo a alkansá dos peaton.
E promé patruya ku a yega na e sitio a pidi ambulans ku urgensia mirando e gravedat di e víktimanan. Ambulans a presentá i a kuminsá duna asistensia na e promé víktima. Ta trata di un hende hòmber den un situashon hopi grave. Despues di a stabilis’é a transporte ku urgensia pa hospital. A konstatá ku ta trata di un turista ku ta di bishita na Aruba. E di dos víktima ta un hende muhé, tambe turista, ku a risibi bastante sla. E tambe a keda transportá pa hospital ku urgensia.
Bosero polisial a informa ku spesialista di tráfiko a yega na e sitio i tambe polis tékniko i a kuminsá ku e investigashon. E outo ku a alkansá e dos peatonnan a kore bai for di e sitio pues por papia di un kaso di “ Hit & Run”. Despues di un investigashon relámpago polis di tráfiko a bin topa ku e outo na un kas na Tamarijn. A detené e shofùr i a konfiská e outo pa mas investigashon.
Den oranan di mardugá, 01:00, polis di Aruba a haña informashon ku e turista maskulino a fayesé, asina dr. Nommerman a konstatá. Ta trata di e turista hende hòmber Ali BINER nasi na Merka di 75 aña.
Polis ta hasi un apelashon na tur outomobilista pa den e dianan aki sea mas konsiente i pone atenshon den tráfiko i hopi importante baha velosidat.
