WILLEMSTAD.- Politur a haña nan ta atendé ku un kaso basta pekuliar. Na promé instante a kere ku ta trata di un kaso di ladronisia di vehíkulo, pero despues a resultá ku ta e turista mes tabata poko bruá.
Ayera atardi personal di Politur a bai den área di Pietermaai despues ku un turista a indiká ku nan a hòrta su vehíkulo ku e tin di hür. Ora Politur a presentá na e sitio, nan a komprondé for di e turista ku el a sali su hotèl i kana bai su vehíkulo pero no por a haña esaki. Politur a tuma tur detaye i mesora a kuminsá buska e vehíkulo. No a dura muchu ku den e área mes a haña e vehíkulo pero un poko mas leu.
A sali na kla ku ta e turista tabata poko turdí i a brua un tiki den e área, pues no tabata nada di ladronisia.
