WILLEMSTAD – Awe mainta na Playa Piskadó un turista a resultá heridá ora ku chapaleta di un boto a kòrta e víktima. Segun promé informashon ku EXTRA a risibí, e motor di e boto a kousa herida na man i otro parti di kurpa di e turista. Ambulans a bai na e sitio pa asistí e persona heridá. Na e momentu aki no tin informashon konosí ainda tokante gravedat di su heridanan.
E insidente ta pone atrobe e situashon na Playa Piskadó bou di lupa. E sitio ta atraé hopi bishitante i turista, miéntras ku na mesun área piskadónan ta sigui ku nan aktividatnan diario ku boto. E atrakshon di turtuga tur dia ta hala un kantidat di hende na e sitio. Den pasado ya tabatin vários kaso di konfrontashon i problema einan.
Ta importante awor pa determiná kon e insidente a sosodé i kua sirkunstansia a hunga un papel. EXTRA ta pendiente pa mas informashon tokante estado di e turista i investigashon di e insidente.
UPDATE: Segun promé investigashon di polis, e turista tabata snòrkel, na momentu ku un boto ku ta wòrdu usá pa piskadónan a pasa i e chapaleta a alkansa e turista. E turista a risibí kòrtá na su brasa robes i na su hep. Ku ambulans a transportá e turista pa Sala di Emergensia di C.M.C. pa tratamentu médiko. Personal di Politur ta kontinuá ku e kuido posterior mientras investigashon den e kaso ta sigui.
(Foto File)
