WILLEMSTAD – Un biaha mas un bishita pa bai wak flamingonan awor na Sami Liber a terminá den un eksperensia desagradabel pa algun turista. Ladronnan a kibra den nan vehíkulo i bai ku tur nan pertenensia. Segun informashon ku EXTRA a risibí, e turistanan a yega na e área pa bishitá e sitio kaminda por wak flamingo. Nan a laga nan vehíkulo stashoná i a sigui na pia pa bai wak e flamingonan. Ora nan a regresá nan pikòp a topa ku ladronnan a kibra drenta i bai ku tur nan pertenensianan ku tabata den e vehíkulo.
Entre loke a keda hòrtá tabatin tambe nan telefòn, ku a pone e turistanan den un situashon ainda mas difísil, pasobra nan no tabatin manera pa yama Polis pa pidi asistensia. Segun informashon, despues di e insidente e turistanan a spanta i a disidí di sali for di e área. Nan a bai te na Marriott Hotel, kaminda nan a pidi yudansa pa por tuma kontakto ku Polis. For di Marriott a logra yama Polis pa informá nan di loke a sosodé. E insidente ta bolbe pone atenshon riba ladronisia for di vehíkulo na lugánan ku turista ta bishitá, kaminda un vehíkulo ku ta keda stashoná miéntras e bishitantenan ta kana bai wak un atrakshon por bira un blanko pa ladronnan. No muchu tempu pasa mesun insidente na Willibrordus.
