ANKARA, TURKIA, AP.-  E banko sentral di Turkia a inyektá plaka den bankonan djaluna meimei di un krísis monetario kousa pa preokupashonnan pa e polítikanan ekonómiko di presidente Recep Tayyip Erdogan. Esakinan ta inkluí tenshonnan komersial i diplomátiko ku Merka.

Lira turko a kai siman pasá i djaluna esaki a kai ku 7% mas miéntras e medidanan di e banko sentral no a logra restourá e konfiansa di invershonistanan.

E insertidumbre a kousa ku e merkado mundial a kai i a kousa un bahada fuerte den moneda di otro paisnan emergente manera Suráfrika i India. Esaki ta debí na e miedu ku e problemanan finansiero ta ekstendé.

Lira a kai ku un rèkòrt di 7,23 dòler djadumingu anochi despues ku Erdogan a mantené su postura desafiante ku su polítikanan ekonómiko, ademas di e konfrontashon ku Merka, un aliado di NATO.

“Turkia ta víktima di un guera ekonómiko”, segun indikashon di Erdogan djaluna, den un di e serienan mas resien di diskurso. “Nos ta tumando e pasonan nesesario kontra e atakenan i nos lo sigui hasi esaki”.

E mandatario a menasá ku buska aliansanan nobo i a atvertí ku mester di medidanan drástiko si empresanan saka moneda estranhero di e bankonan. Esaki ta un komentario kual a wòrdu konsiderá komo un posibel relashon mas serkano ku Rusia.

LAGA UN KOMENTARIO

Please enter your comment!
Please enter your name here