ANKARA, TURKIA, AP.- Periodista Jamal Khashoggi a wòrdu strangulá na momentu ku el a drenta konsulado di su pais na Istanbul, den un akto premeditá. Su kadaver a wòrdu desmembrá promé ku el a wòrdu saká di e sitio, asina un fiskal turko importante a bisa djárason.
E ofisina di fiskal prinsipal di Istanbul Irfan Fidan a bisa den un deklarashon ku e diskushonnan ku e fiskal saudi al-Mojeb no a trese “resultadonan konkreto”
E deklarashon tabata e promé konfirmashon públiko pa un funshonario turko ku Khashoggi a wòrdu strangulá i mutilá despues di drenta e konsulado saudi riba 2 di òktober. E deklarashon a indiká ademas ku tin un falta di koperashon entre e funshonarionan saudi den e investigashon di e asesinato.
“Segun plannan elaborá, e víktima, Jamal Khashoggi, a wòrdu strangulá i a muri inmediatamente despues di drenta e konsulado general di Saudi Arabia”, segun indikashon di e ofisina di Fiskal.
“E kadaver di e víktima Jamal Khashoggi a wòrdu desmembrá despues di su morto, segun e plannan inisial pa asesin’é”, asina e deklarashon ta bisa.
Turkia ta buskando ekstradishon di 18 sospechoso detené den Saudi Arabia pa e asesinato di Khashoggi. Ankara a preshoná Riad pa haña informashon riba e kadaver pèrdí di e periodista, kende tabata un kritiko di e prínsipe heredero saudi.
