ANKARA, TURKIA, AP.- Turkia a anunsiá djaweps ku e pais lo desplegá forsanan spesial na su frontera ku Gresia pa impedí ku outoridat griego ta reprimí e migrantenan ku purba drenta Europa. Ankara a habri su portanan pa e migrantenan por krusa i yega Europa.

Míles di migrante i refugiado a purba krusa di Turkia pa Gresia via tera i laman den e último siman ku a pasa. Polis griego a rechasá nan ku gas lakrimógeno i dor di spùit awa riba nan. Aparte di esaki, Gresia ta akusá Turkia di tira gas kontra su seguridat na frontera.

Segun Turkia, outoridat griego a ataka e migrantenan ku arma di guera. E minister di Interior turko, Suleyman Soylu, a bisa djárason ku e lo akusá Gresia den Korte Europeo di Derechi Humano pa tira un migrante mata na frontera. E gobièrnu griego a ninga e insidente aki, konsiderando e komo “notisia falsu”.

Soylu, kende a bishita frontera djaweps a bisa ku Turkia lo desplegá mil efektivo di su forsanan spesial na frontera pa impedí ku outoridat griego ta rechasá esnan ku purba krusa.

Soylu a bisa ku Gresia a violá e konvenshonnan internashonal dor di a rechasá 4.900 migrante i a akusá Union Europeo i su agensia di protekshon na frontera Frontex pa keda ketu.

LAGA UN KOMENTARIO

Please enter your comment!
Please enter your name here