ISTANBUL, TURKIA, AFP.- Turkia a anunsiá atakenan aéreo kontra basenan kurdo na nort di Siria i Irak, ku segun Ankara, a usa esakinan pa lansa atakenan “terorista riba su teritorio”.
E atake a tuma lugá despues di e eksploshon den sentro di Istanbul djadumingu último, kaminda seis persona a muri i 81 a keda heridá.
E Ministerio di Defensa turko a indiká ku e bombardeonan tabata dirigí kontra posishonnan di Partido di Trahadónan di Kúrdistan (PKK) i Unidat di Protekshon Popular (YPG), ku Ankara ta konsiderá komo un ekstenshon di e formashon ilegal di e kurdonan na Turkia.
Turkia ta kulpa PKK pa e atentado na Istanbul, esun di mas mortal den sinku aña. Pero niun individual òf grupo a asumí responsabilidat i tantu PKK komo YPG a ninga nan embolbimentu den e atake.
Despues di e bombardeonan di Turkia a registrá lansamentu di dos rakèt desde Siria, ku a alkansá un puesto turko na frontera i heridá por lo ménos tres miembro di forsanan di seguridat, segun e agensia ofisial turko Anadolu. E agensia ta akusá YPG di ta responsabel pa e atake.
Vários biaha presidente turko Recep Tayyip Erdogan a akusá Washington di ta proveé arma na kombatientenan kurdo na nort di Siria, kual Ankara ta konsiderá komo “terorista”.
