ANKARA, TURKIA, AP.- E Ministerio di Interior di Turkia a retirá kasi 9.000 polis, burókrata i mas personal i a para míles di supuesto konspirador despues di un gòlpi di Estado ku a frakasá. Asina e agensia di notisia estatal turko a indiká djaluna.
E notisia tokante e retironan i detenshon a surgi miéntras Merka i Union Europeo a pidi e gobièrnu turko pa mantené demokrasia i respetá e derechonan humano miéntras nan ta persiguí tur militar i tur esnan involukrá den intento di e gòlpi.
E agensia di notisia estatal Anadoluu a indiká ku un total di 8.777 empleado vinkulá ku e ministerio a keda retirá, entre nan 30 gobernador, 52 inspektor di servisio sivil i 16 asesor legal. Otro rapòrtnan di medio a señalá ku agentenan di polis i di polis militar, manera personal di warda kosta tambe a keda retirá di nan kargonan. E gobièrnu a kulpa e gòlpi frakasá di djabièrnè na siguidónan di un klérigo musulman ku ta biba den Merka i ku esaki a kombertí den e opositor prinsipal di presidente Recep Tayyip Erdogan. E konflikto ta krea un situashon diplomátiko difísil. Turkia ta un pais miembro di OTAN i un aliado krusial di Oksidente den e lucha kontra Estado Islámiko, pero EU i Merka a indiká ku nan ta preokupá pa e reakshon di outoridat turko.
