Situashon na Klein Kòrsou ta interes ekonómiko vs naturalesa:
WILLEMSTAD. – Djabièrnè mainta trempan e tim di “handhaving” formá pa personal nan di GMN, VVRP i nan Gabinete a bishitá Klein Kòrsou bou di guia di ‘Sea Turtles Conservation Curaçao’ p’asina tuma nota di e situashon di e turtuganan riba e isla.
Señora Vreugdenhil ‘Sea Turtles Conservation Curaçao’ a duna e tim splikashon di e situashon i tambe un tiki historia pa asina por komprondé e seriedat di loke e turtuganan ta eksperensiando.
Por a tuma nota di vários konstrukshon den e áreanan kaminda ku e turtuganan ta pone webu, tambe a topa ku vários webu di turtuga bou di e palapanan.
E áreanan aki a wòrdu kreá pa turistanan por hasi uso di dje i mas ku klaro esaki ta afektá e hogar di e turtuganan.
E turtuganan a demostrá ku nan tin mester di e partinan kaminda awor hende a poderá di dje ku finnan lukrativo.
E tim ku tabata di bishitá na Klein Kòrsou a keda sorprendí ku loke nan wowo a mira i a mustra hopi interes pa por trese un solushon pa ku e turtuganan.
Nan a saka potrèt di e situashon pa asina traha e prosèsverbal i tambe pa por duna minister konseho kon pa atené ku esaki di e mihó forma posibel.
Sigun Vreugdenhil e kos mas importante ta ku e instansianan konserní ta na altura di e situashon awor i basá riba e leinan di protekshon di turtuganan lo bin ku solushon. A bini ku vários idea dilanti i un di nan ku a resaltá ta pa pone “Ranger” na Klein Kòrsou pa kuida e áreanan aki.
