BOGOTA, COLOMBIA, AFP.- Twitter a suspendé e kuenta di Antonio Garcia, e máksimo komandante di e gueria ELN ku ta negoshando pas ku e gobièrnu di Colombia, despues ku e rebelde a manda un serie di mensahe intimidando periodistanan.
E presidente Gustavo Petro a rechasá e mensahenan atraves di Twitter i a pidi outoridatnan pa garantisá integridat di e periodistanan.
E Fundashon pa Libertat di Prensa (FLIP) a deskribí e mensahenan komo “intimidashon”.
“Nos ke pidi ELN i sobra gruponan arma ku ta negoshando pas ku e Gobièrnu pa stòp ku e menasanan i intimidashon di prensa”, asina e ONG a añadí riba Twitter.
Meimei di e konflikto interno prolongá, FLIP a registrá 200 menasa kontra periodistanan den e pais na 2022 i dos asesiná.
E promé iskierdista ku a yega na poder na Colombia ta negoshando pas ku e gueria desde novèmber, den diálogonan ku a sufri hopi kontratempu.
Un terser siklo di kombersashon entre ELN i boseronan ofisial lo tuma lugá na Cuba riba 26 di aprel.
