VELSEN-ZUID.- Tyrese Noslin ayera tabata importante den Telstar su viktoria di 3-0 riba Heracles. E miembro di selekshon di Kòrsou tabatin anotá i tambe duna pase di gol, pa asina yuda su ekipo kue e tres puntonan.
Noslin ku tabata titular i hunga 80 minüt di e partido, a skor su gol na di 72 minüt i sinku minüt despues a duna pase di gol.
Tyrese Noslin awor tin 4 gol i 3 pase di gol den 38 partido e temporada aki. E futbolista di 23 aña a hunga den tur 33 partido di Eredivisie (promé divishon hulandes) pa Telstar e temporada aki. Den 25 di e weganan aki e miembro di selekshon di Kòrsou tabata titular. Den mesun partido aki e kiper suplente di selekshon di Kòrsou Tyrick Bodak tabata riba banki pa Telstar, pero e no a mira akshon.
Miéntras pa Heracles e defensa di rais YDK Mimeirhel Benita tabata titular, i a hunga wega kompletu den e derota di su ekipo.
E viktoria di ayera ta saka Telstar for di zona di degradashon, faltando un wega pa temporada finalisá.
