BUDAPEST, HUNGRIA, AP.- Uber a presentá un keho djamars di lanti Komishon Europeo kontra Hungria, kaminda un lei a drenta na vigor ku ta práktikamente prohibí e servisio di taksi partikular. E lei a drenta na vigor den yüli. Rov Khazzam, atministrador general di Uber den Europa Sentral, a bisa djárason na The Associated Press ku e ophetivo di e empresa tabata pa hiba e servisio atrobe na Budapest, kaminda esaki a kuminsá funshoná na final di 2014. Uber tin 160.000 usuario i 1.200 shofùr na Hungria. ” Nos kier reanudá un servisio ku hopi hende ta usa”, segun Khazzam a bisa. “Nos kier sigurá ku e pueblo di Hungria tin akseso na un servisio ku ta disponibel den kasi tur pais di Union Europeo”.
Un lei ku Parlamento a aprobá den yüni i kuminsá apliká dia 24 di yüli, ta permití outoridat pa duna but na Uber i servisionan similar, blòkia su wèpsait i aplikashon, prohibí e sirkulashon di vehíkulonan di shofùr pa tres aña i suspendé nan lisensia durante seis luna. Uber a suspendé aktividatnan na Hungria dia 24 di yüli mèrdia, i komo despedida a ofresé usuarionan un biahe grátis na kualkier di e 21 paisnan europeo kaminda esaki ta funshoná.
Hungria a prohibí Uber indikando ku e empresa a a logra bentahanan ignorando regulashonnan ku ta wòrdu apliká na servisionan di taksi.