LA PAZ, AP.- Union Europeo, Merka i otro paisnan a primintí ku lo yuda kombatí e kandelanan di selva ku a afektá Bolivia ya pa kasi dos luna kaba i ku a bira inkontrolabel den e último simannan ku a pasa, apesar ku a desplegá avionnan gigante i operashonnan riba tera ku brigadista i voluntarionan.
“Nan a pidi nos sosten tékniko i material i nos lo reakshoná riba esaki i sigui reforsá e inkietut i nesesidatnan den e Estado Boliviano”, asina e embahador di Union Europeo na La Paz, Leon de La Torre a bisa, despues di un reunion ku kansier un dia promé.
E kansier, Diego Pary a reuní ku tur representante diplomátiko den e pais i a informá nan tokante e operashonnan pa mitigá e kandela aki.
E persona ku ta representá Merka, Bruce Williamson, a bisa ku e reunion tabata hopi útil dor ku a logra determiná kiko e pais mester i ku lo koperá ku outoridat boliviano pa manda mas yudansa.
E kalor generá pa e kandela, temperatura haltu di kasi 40 grado Celsius, falta di humedat, bientu fuerte i ‘onkruid’ ta kreando bolanan di kandela di te ku 12 meter haltu.
