KIEV, UKRANIA, AFP.- Ukrania a bisa djadumingu ku el a logra frustra un atake “importante” den oranan di anochi. E atake a wòrdu lansá kontra Kiev i e presidente Volodymyr Zelensky a elogiá defensanan anti aéreo di e pais.

E bombardeo di anochi a laga por lo ménos dos morto i tres herido, segun outoridatnan.

E atake a pasa na momentu ku Rusia ta intensifikando su bombardeonan kontra e kapital ukraniano. E pais a lansa vários atvertensia kontra potensianan oksidental despues ku Merka a duna lus bèrdè pa Kiev haña akseso na avionnan di kombate F-16.

Gobièrnu a bisa ku e bombardeo ta un di e “atakenan di mas importante kontra e kapital desde komienso di e invashon”.

Presidente Zelensky a gradisí e labornan di defensa anti aéreo. Esaki ta e di 14 atake ku drone kontra Kiev desde komienso di mei.

Outoridatnan militar a bisa ku e atake a desaroyá den vários fase i ku e alerta aéreo a dura mas ku 5 ora.

E alkalde di Kiev, Vitali Klitschko a bisa ku e atake tabata “masivo” i a añadí ku e dronenan a wòrdu lansá for di vários direkshon na mes momentu.

LAGA UN KOMENTARIO

Please enter your comment!
Please enter your name here