Sekretario di Estado Marco Rubio (2-r) i Konseho Nashonal di Seguridat Mike Waltz (r) despues di nan reunion ku un delegashon di Ukrania ayera.
YEDA, Arabia Saudita (AFP).- Ukrania ayera a apoyá un proposishon di Merka pa para e guera ku Rusia pa un periodo di 30 dia, poko despues di e atake ukraniano mas grandi kontra di teritorio ruso hasiendo uso di drone.
Despues di un enkuentro entre representantenan di gobièrnu merikano i ukraniano na Yeda, Arabia Saudita, e sekretario di estado di Merka, Marco Rubio, a bisa ku Ukrania a aseptá “negosiashonnan inmediato” ku Rusia i awor e bala ta den skochi di Mòsku pa aseptá un periodo di trankilidat.
E reunion a konta ku partisipashon di minister di Relashonnan Eksterior di Ukrania, Andrii Sibiga, pero ningun representante ruso tabata presente.
Awor Merka mester “konvensé” Rusia pa aseptá pa wanta ku e guera pa un periodo di 30 dia, segun e presidente ukraniano, Volodimir Zelenski, “Ukrania ta aseptá e proposishon aki”, el a bisa durante di su diskurso diario.
Na Washington, Donald Trump a bisa ku probablemente lo e papia ku su kolega ruso, Vladimir Putin, e siman aki. “Mi sa ku nos ta bai tin un reunion importante ku Rusia i nos ta spera ku e kòmbersashonnan lo sigui bon”, segun el a komentá, sin duna mas detaye.
Mòsku, di su parti, a bisa di no ta deskartá ku den próksimo dianan lo tin kontakto ku Merka.
Pa e asesor norteamerikano di Seguridat Nashonal, Mike Waltz, e punto awor ta di sa “kon” i “si” e guera mester kaba.
