Presidente ukraniano Volodimir Zelenski (d) huntu ku presidente aleman,
Frank-Walter Steinmeier.
KIEV, Ukrania (AFP).- Ukrania ta kla pa tuma “medidanan pa mengua” e atakenan si Rusia ta hasi e mesun kos, esei di akuerdo ku e presidente ukraniano Volodimir Zelenski. E presidente di Ukrania a bisa esei despues ku Donald Trump a anunsiá ku “e enemigunan tin un akuerdo pa pone fin di atakenan riba ophetivonan energétiko”.
Ku e oumento bárbaro di preis internashonal di petrolio, den wikènt último Trump a lansa krítika kontra di Ukrania pa su atakenan riba refinerianan ruso, i a bisa ku esei ta provoká un eskases di diesel.
Trump a asentuá ku e guera entre Rusia i Ukrania, i no Iran, tabata e motibu pa preisnan subi na Merka. Riba retnan sosial, e mandatario republikano a anunsiá djaluna ku “Ukrania a aseptá pa no ataká ophetivonan energétiko ruso. Rusia a hasi e mesun kos”, segun Trump.
Mòsku no a duna komentario inmediato. Di su parti, Zelenski a referí na “un proposishon sólido di Merka riba un suspenshon mutuo di e atakenan kontra di infrastruktura krítiko. “Si esaki por bira e promé paso pa baha man ku e atakenan, pa stòp e atakenan ruso kontra di nos infrastruktura krítiko, i nos tambe komo reakshon, e ora ei Ukrania ta dispuesto na apoyá pa mengua e atakenan”, Zelenski a bisa den su diskurso diario.
E presidente ukraniano a agregá ku “e rusonan ta sintiendo e preshon debí na nos kontestanan presis kontra e ekonomia di guera di Rusia”. El a agregá ku “te na e momentu akí ningun hende a mira un deseo di parti di Rusia pa yega na fin dje guera”.
