IEV, Ukrania (AFP).- E kansier ukraniano ayera a duna di konosé ku no tin “pruebanan serio” di supuesto atake di Kiev riba un residensia di Vladimir Putin, supuesto insidente pa kua Kremlin a bisa di lo hasi mas fuerte su posishon pa kaba ku e guera.
E oumento repentino di e tenshon diplomátiko ta tuma lugá poko despues ku Washington i Kiev a anunsiá avansenan den e negosiashon pa yega na un akuerdo pa pone fin na e konflikto aki, ku a start ku e invashon ruso di Ukrania den 2022. “A pasa kasi un dia i Rusia ainda no a presentá pruebanan di supuesto atake di Ukrania riba e residensia di Putin”, segun e minister di Relashonnan Eksterior ukraniano, Andrii Sibiga, riba ret sosial X. “I nan lo no hasi esei, pasobra no tin ningun. “Nada dje tipo di atake ei no a tuma lugá”, el a asentuá.
Mas aleu el a lamentá e kondenanan di supuesto atake di parti di Emiratonan Árabe Uni, India i Pakistan ku, na su opinion, “ta mishi ku e proseso konstruktivo di pas ku aktualmente ta avansando. “Reakshonnan manera esaki ta afirmashonnan manipulá i infundá di Rusia ku solamente ta sirbi e propaganda ruso i ta animá Mòsku pa kometé mas atrosidat i mentira”, segun el a agregá.
Djaluna último, Rusia a akusá Ukrania ku den oranan di mardugá e residensia ofisial di Putin den e region di Novgorod – entre Mòsku i St. Petersburg – a keda ataká pa 91 drones. Komo konsekuensia, Kremlin a anunsiá di lo hasi “mas fuerte” su posishon den e negashonnan pa yega na pas.
