Ukrania lo vense, asina e presidente ukraniano Volodymyr Zelensky a bisa, un dia promé ku e aniversario di e invashon di Rusia, kondená pa gran mayoria di Asamblea General di Nashonnan Uní.
“Nos a superá hopi prueba i nos lo triunfá”, asina Zelensky a bisa.
Na New York, Asamblea General di Nashonnan Uní a aprobá un resolushon ku ta eksihí retirada inmediato di e trupanan di Rusia den e èks repúblika soviétiko ku 141 voto na fabor, 7 kontra i 32 apstenshon.
E resistensia di Ukrania kontra e invashon a konta ku un respaldo militar fuerte i finansiero di potensianan oksidental, ku djaweps a urgi Fondo Monetario Internashonal (FMI) pa aprobá un pakete nobo di yudansa.
Kas Blanku ya a indiká ku Merka lo implementá sanshonnan amplio kontra sektornan klave ku ta generá entrada pa e presidente ruso, Vladimir Putin.
