Update: Algun siman mas pa Kòrsou yega na akuerdo ku Ulanda

No a logra akuerdo ku Ulanda awe!

WILLEMSTAD.- E tres premiernan di paisnan ulandes den Karibe a sali ku un kara un poko mas trankil for di e reunion ku Konseho di Minister di Reino na Den Haag. Premier Eugene Rhuggenaath a bisa prensa na momentu ku el a sali pafó ku e ta kontentu di por tabata huntu ku su koleganan di Aruba i Sint Maarten pa asina huntu enfrentá Ulanda den e situashon ku a presentá. Mesora el a aklará ku no a yega na akuerdo ku Ulanda.

Manera EXTRA a informá mas tempran, esaki a keda konfirmá pa premier Rhuggenaath ku no a logra un akuerdo pasobra e no tabatin mandato i no por a bai di akuerdo ku loke tin riba mesa, esta pa bini ku un lei di konsenso di reino. Sinembargo a palabrá ku e paisnan Kòrsou, Aruba i Sint Maarten lo hasi esfuerso pa kumpli ku e kondishonnan ku ta korespondé na e di dos tranche di yudansa finansiero pa 15 di yüli próksimo.

Mientrastantu tin espasio pa sigui papia ku Ulanda pa yega na un akuerdo total. E premier di Kòrsou a bisa mas leu ku sèn lo bini na momentu ku Kòrsou kumpli ku e kondishonnan mará na e último tranche. Den e simannan ku ta bini mester bai traha na un pakete total ku e paisnan di reino den Karibe ta realmente parti di dje i ku nan por defendé ante e pueblonan tambe.

 

Ulanda; No tin akuerdo riba yudansa pa Kòrsou

DEN HAAG.-Informashon ekstraofisial for di Den Haag, sede di gobernashon ulandes, ta mustra ku Konseho di Minister di Reino a reuní den kua a papia ku e premier di Kòrsou, Aruba i Sint Maarten. No tin konfirmashon ofisial ainda, pero tin indikashon serio ku no tin akuerdo den gabinete ulandes pa loke ta trata e yudansa na e tres paisnan. Tur tres premier a bai Ulanda pa enfrentá Ulanda despues di e kondishonnan sumamente severo ku sekretario di estado Raymond Knops a presentá den un pakete di 218 página i dunando e paisnan 4 dia pa disidí sin ku a konsulta Raad van Advies ni e respektivo Parlamentonan.

Premier Eugene Rhuggenaath den un prome reakshon a indiká ku e kombersashon ku el a sostené ku gobièrnu ulandes a bai bon i ta spera ku den simannan benidero lo yega na un akuerdo.

 

 

 

 

 

 

fotos FB Rhuggenaath

SHARE

LEAVE A REPLY