Ulanda ta duna yudansa finansiero pero den forma di fiansa sin interes

ULANDA.- Konseho di Minister di Reino a tuma lugá awe i mas despues e minister enkargá ku asuntunan interno i relashonnan den Reino Raymond Knops a duna di konosé ku gobièrnu di Reino ta sostené e esfuersonan ku gobièrnunan i komunidat di tur e islanan ta hasi pa kontené Covid-19. Nan ta bon konsiente ku e ‘lockdown’ tin un impakto hopi grandi riba e islanan ku ya kaba tin problemanan finansiero. E desishon ku a kai awe na Ulanda ta ku ta duna yudansa di presupuesto mesora na e tres paisnan Aruba, Kòrsou i Sint Maarten. E ta bira un fiansa sin interes i no tin fecha ki dia mester pag’é.

Minister Raymond Knops a splika ku Covid-19 tin konsekuensianan hopi grandi pa tur pais den Reino. E ta yama danki na tur e profeshonalnan ku ta yuda i kuida esnan malu den hinter Reino. gobièrnunan mester perkurá pa sufisiente ekipo médiko riba tur e isla i tambe pa e aspekto finansiero ta kubrí, sigur e parti di yudansa di emergensia.

Den reunion di awe a papia ku e ministernan plenipotensiario riba kiko mester sosodé. E urgensia ta grandi! Pa e motibu ei tambe a bai di akuerdo ku yudansa di emergensia ku ta enserá ku ta pone plaka disponibel pa asina e gobièrnunan di e paisnan por kubri gastunan nesesario awor ku entradanan a kai drástikamente. Tanten ta sigui wak e paketenan di yudansa di kada pais pa wak kon mester atendé ku esakinan i implementá nan.

Pa e prome seis simannan benidero ta bini yudansa finansiero for di Ulanda, tanten ta studiando i evaluando e situashon pa den kaso ku e situashon kontinuá pa mas largu. Ta importante pa na mes momentu kuminsá traha riba sistemanan pa hasi e paisnan fuerte pa nan mes por karga ku posibel situashonnan di krísis ku por presentá den futuro. Riba e pregunta dikon fiansa i no un regalo e mandatario ulandes a splika ku gobièrnu ulandes no por bai splika e pagadó di belasting ulandes ku ta hasi regalo ku su plaka di belasting di e forma ei, miéntras ku e pueblo ulandes si mester kumpli ku medidanan pa tene e pais salú finansieramente. Mester kòrda aki riba e medida pa subi edat di penshun i asina tin mas di e medidanan ei. Pues e ta bira un fiansa sin interes i no un regalo. Mas detaye den edishon di EXTRA.

SHARE

LEAVE A REPLY