PARIS, FRANSIA, AFP.- Merka ta negoshando ku Iran; Presidente di Merka Donald Trump a deklará ku e negosiashonnan ku Iran pa pone fin na e guera na Medio Oriente ta kanando, i a añadí ku Tehran tin hopi gana di yega na un akuerdo.
“Nos ta negoshando na e momentunan aki”, asina Trump a bisa na periodistanan i a splika ku e vise presidente JD Vance sekretario di estado Marco Rubio i e enviado Steve Witkoff i su suegro Jared Kushner ta partisipá den e kombersashonnan.
E mandatario a agregá ku Iran a entregá un regalo hopi grandi relashonal ku e petroli i gas ku ta bal un kantidat di sèn, sin duna detaye.
Operashonnan di Merka kontra Iran ta sigui sin stòp
E bosero di Kas Blanku Karoline Leavitt a deklará den un komunikado na AFP ku miéntras presidente Donald Trump i su negoshadónan ta eksplorá un posibilidat diplomátiko nobo, e operashon na Iran ta kontinuá sin stòp, pa alkansá e ophetivonan militar establesí pa komandante en hefe i Pentágono.
Israel ta reafirmá ku su plan na Iran i Líbano no a kambia
E ehérsito israelí a afirmá ku ta sigui aktua segun un plan sin para na Iran i Líbano, independientemente di kualke negoshashon destiná pa alkansá un akuerdo pa pone fin na e hostilidatnan.
“Nos ta aktuando segun un plan inaltera”, asina e bosero militar israelí, general di brigada Effie Defrin a bisa durante di un rueda di prensa na televishon, kontestando un pregunta riba e esfuersonan diplomátiko pa pone fin na e guera.
I miéntras tantu e guera ta sigui i por mira na diferente lugá na Líbano entre otro bentananan kibrá i huma ta sali kaminda e bombardeonan a tuma lugá. Tambe por mira destrukshon di un edifisio na Bnei Brak
