BARRANQUILLA. – Un atake terorismo riba un stashon di polis na San Jose a sorprendé henter komunidat di Barraquilla i Colombia den su totalidat. E atake a laga un saldo di 5 agente polisial morto i no ménos ku 41 herido serio. Tabata den oranan di mainta tempran di djasabra ora ku e agentenan polisial a reuní huntu pa risibí òrdu di trabou di dia. E momentu ei tabatin dos eksploshon kasi simultáneo, ku a sòru pa in konsternashon inkontrolabel. Kuater di e agente polisial a muri na e sitio i e di sinku a fayesé na hospital ora ku tabata trata di skapa su bida. E suidat di Barranquilla a ekspresá nan rabia i doló ku e atentado aki a kousa nan.
Tin un aresto di un hòmber di 31 aña di edat ku nan ta kere ku tin vínkulonan ku e atentado. A haña elemento nan komprometedor serka e hòmber aki. E munisipio a pone tambe un suma di 50 mion peso pa e tep di oro ku por kondusí na e outornan intelektual di e krímen aki.
E atentado aki a pone un lus skur riba e gran fiesta di karnaval ku aki un par di siman Barranquilla lo selebrá. Barranquilla e úniko munisipio di Colombia ku ta selebrá karnaval en grande.
