WILLEMSTAD – Un biaha mas malechornan a haña ta bon pa kousa destrukshon na skol AGO Iris Bruining. Polis mester a akudí na e skol aki den Commanchestraat awe mainta pa tuma denunsia i tuma nota kuantu glas malechornan a kibra. Ta trata aki di un edifisio nobo i ta solamente dos luna ta einan. No ta promé biaha ku e malechornan ta kibra e bentana nan ku piedra. Tur esaki strobando dunamentu di lès mainta i sigur influensia e ánimo di e hóbennan ku ta yega skol pa eduká nan mes. Ta trata aki di solamente un akto di destrukshon ya ku no a drenta pa hòrta nada den e skol. Ademas e skol ta bon ekipo ku katara nan di vigilansia. Polis lo wak si e kámara nan lo por a kapta momentu ku nan a bati e skol ku piedra. E kaso ta bou di investigashon.
