WILLEMSTAD – Na fin di e di 20 edishon di Ride, Swim, Walk & Run for the Roses djadumingu 25 di yanüari último, fundashon Ride for the Roses Curaçao (RFTRC) por wak bèk ku satisfakshon riba otro evento eksitoso ku a produsí un biaha mas un bunita suma. Un danki ta bai na promé lugá na e mas o ménos 7500 partisipante ku a forma parti na e diferente partinan. RFTRC ta yama danki tambe na e patrosinadornan grandi i chikí, un ehérsito di boluntario i e diferente instansianan ku a pèrkurá pa un desaroyo rápido i seif di evento. Ku sosten di tur e persona i institutonan aki pronto lo por agregá e bunita suma di mas ku 500.000 florin na e reservanan ku ta destiná pa sigui respaldá, Prinsesa Wilhelmina Fonds(PWF) na benefisio di e pashèntnan di kanser aki na Kòrsou.
Resultadonan di e partinan kompetitivo
E resultado di e Run for the Roses ta lo siguiente.
Pa e kareda di 2 kilometer (te 12 aña): mucha muhé 1. Danique Jozefa, 2. Kylie Huizing, 3. Sophie Waegenmaker i mucha hòmber 1. Baaz Waegenmaker, 2. Sandy Lint i 3. Liza Minelli.
Damanan 5 kilometer: 1. Isis Schauwe, 2. Annia van der Bijl, 3. Queen-Shadey Valies.
Hòmbernan 5 kilometer: 1. Danny, 2. Olof de Ruyter, 3. Nychel Valies.
Damanan 8.5 kilometer: 1. Mariana Pereira, 2. Kim Klappe, 3. Suus Krediet.
Hòmbernan 8.5 kilometer: 1. Jonathan Jansen, 2. Marvin Jozefa, 3. Stefan Duivenstein.
Na e Swim for the Roses riba un distansia di 2.7 kilometer a resultá entre e damanan 1. Zinha Falbru (39 minüt) 2. Gabriela Johannes Maduro (0:42) i 3. Evenangely Koeiman (0:47). Na e hòmbernan: 1. Noah Angela Alders, 2. Anderson Hart Statius i 3. Sebastian Marcano, tur tres ku e mesun tempu (0:39). E hòmbernan aki tabatin hopi difikultat pa tene e promé dama nan tras. Pero mester agregá mesora ku Zinha Falbru promé a landa kaba di Mambo kontra ola i koriente pa Jan Thiel pa despues e kompetí ku nan pa bai Mambo bèk.
