WILLEMSTAD – Polisnan tabata ku man yen ku kasonan di ladronisia awe mainta i aparte di e robonan grandi na KFC i McDonald’s awor a bira konosí ku e kadena di hotèl Coredon tambe a bira víktima di un robo grandi. Polisnan mester a bai riba Motetwerf riba tereno di CPA ku mester tin bon seguridat pero pa un motibu òf otro no tabata e kaso. Algu ku niun hende no por komprondé ainda ta kon e ladronnan por a drenta bai paden riba e tereno aki di CPA. Den e kaso aki a pasa drenta ku un vèn ku ya ta algu ineksplikabel pa despues kibra e muraya di e depósito di Corendon. Aki e kriminalnan a logra kue tur e èrkonan nobo ku tabata warda den e depósito i tambe un gran kantidat di palèt di televishon. No por a bisa un kantidat spesífiko pero si ku ta trata un kantidat grandi. E daño di e ladronisia aki tambe ta sumamente kuantioso. No mas ku algun tempu pasa tabatin un ladronisia grandi na e mesun sitio ora ke ladronnan na e okashon ei a logra bai ku un kantidat grandi di unifòrm di selekshon di Kòrsou ku tabata destiná pa bende ku públiko. E kaso aki meskos ku tur otronan ta bou di investigashon.
