Un músiko ekstraordinario, un leyenda…
WILLEMSTAD.- Di shòk ainda ora mi a risibí un ‘app’ pa informá mi ku Juni Balentina a fayesé ayera tardi. Farándula di Reino a keda sorprendé ku e notisia ku Juni a fayesé i esaki a kousa un konmoshon bou di músikonan, fanátikonan i amistatnan di Juni.
Pa nos i pa hopi, un músiko ekstraordinario ku tabata un inspirashon pa hopi drùmer i hopi ku danki na dje a haña e push pa bira drùmer. Un dje motornan di ritmo kombiná formá pa músikonan di Gio Fuertisimo den inisio di dékada 90.
Pero Juni tabata konosí promé ku esei. Ami a konosé Juni den Survival, Gibi y Explosivos, despues Gio, Gio Fuertisimo, Tune i bai bèk na su amor di semper Gio.
Juni a forma parti tambe di diferente proyekto musikal i tabata toka últimamente ku Highway Band.
Kòrsou a pèrdè un gran músiko, un leyenda musikal ku a pone hopi baila, gosa, ‘jump’ i para apresiá ora ku e ta tokando su drùmsèt.
Músikonan di Aruba, Boneiru, Hulanda i Kòrsou a yena retnan sosial ku nan palabranan di kondolensia i nos ta uni na nan pa deseá famia, amigunan, fanátikonan forsa ku pèrdidá di e semper alegre Juni Balentina. Ku Juni sosegá na pas.
