…Djadumingu último gobièrnu di Donald Trump a atvertí Canada ku e pais lo ta “bobo” si pensa ku Canada por gana un guera komersial kontra Merka i a pronostiká un impakto devastador pa nan bisiña nort…
WASHINGTON. – Djadumingu último gobièrnu di Donald Trump a atvertí Canada ku e pais lo ta “bobo” si pensa ku Canada por gana un guera komersial kontra Merka i a pronostiká un impakto devastador pa nan bisiña nort.
E negosiashonnan entre Washington i Ottowa a frakasá djabièrnè den oranan lat di atardi , loke a kousa implementashon di tarifanan nobo di parti Merka di 50 % riba merkansianan kanades balorá na mas o ménos 20.000 bion di dòler, 5.5 % di eksportashon total di Canada na su bisiña.
Komo represaya, Ottawa a anunsiá ku e lo igualá e tarifanan ei ku tarifanan nobo ku ta dirigí prinsipalmente riba e industrianan di heru i lechi di Merka, entrante 8 di sèptèmber.
Sekretario di Transporte di Merka Sean Duffy a afirmá ku Canada lo pèrdè si e skohe un guera komersial. “Canada ta benefisiá muchu mas di komersio ku Merka ku Merka ta benefisiá di komersio ku Canada,” el a deklará riba “Fox News Sunday.” “Pa pensa ku nan ta bai guera ku Donald Trump i ku en realidat nan ta bai gana e guera ei ku Merka ta parse mi bobo.” Duffy a bisa.
Duffy a pronostiká ku Promé Minister Kanades Mark Carney lo regresá na mesa di negosiashon “hopi, hopi pronto, pasombra e ta bai ta devastador pa su pais.”
Carney a dal un paso firme djasabra, anunsiando tarifanan di represaya kontra Merka despues di a bandoná loke el a yama un akuerdo komersial “mal” na un momentu ku e rif entre e aliadonan di hopi tempu aki tabata oumentando.
“Bo ta den guera ora ataká bo. A ataká nos,” el a bisa. “Un ‘Bully” na Washington,”
Trump a kontestá djadumingu trempan riba su plataforma di medionan sosial, Truth Social. “Canada ke e benefisionan di ta un estado [di e Union], sin ta un!!!” el a skirbi.
“Nan tambe a imponé tarifanan enorme riba nos magnífiko agrikultornan pa hopi aña. Ta basta!!!” el a agregá.
E hostilidat a destaká e distansiamentu kresiente entre e aliadonan estrecho akí desde ku Trump a kuminsá su di dos periodo na yanüari 2025, inkluyendo su menasanan ripití pa hasi Canada e di 51 estado di Merka.
Carney a deklará ku e relashonnan bilateral a kambia pa semper i Canada mester redusí su dependensia di Merka.
Apesar di e reperkushonnan ekonómiko, el a haña sosten polítiko doméstiko danki na su boluntat pa para kontra di Washington for di ora ku el a tuma ofisina, dos luna despues ku Trump a regresá na e presidensia.
“Nos tin un bully na Washington,” Stuart Edwards, un maestro kanades retirá, a bisa AFP djasabra for di Fort Erie, Ontario, den sombra di e Peace Bridge, un kaminda di awa ku ta hiba míles di miónes di dòler den komersio anual ku Merka.
“Nos no ta bai tolerá esaki; Canada lo no hasié. Nos lo bringa bèk,” el a agregá.
For di momentu ku el a tuma ofisina na mart 2025, Carney a buska pa redusí e dependensia di Canada riba su bisiña grandi buskando partnernan komersial nobo na Asia i Europa.
Aktualmente, Merka ta konta pa aproksimadamente 70% di e eksportashonnan di Canada.
