Un luna despues hacking ministerio BPD

...Minister di BPD, sr. Armin Konket....

WILLEMSTAD.- Na kuminsamentu di novèmber 2019 a bira konosí e kaso di hacking di sistemanan digital di gobièrnu. Pa ser eksakto malechornan a ‘hack’ e ministerio di Maneho di Gobernashon, Planifikashon i Servisio Públiko(BPD). E ministerio aki ta manehá informashon importante di tur personal den e aparato públiko. Un luna despues i no tin muchu klaridat di parti di gobièrnu kiko a pasa ni kon lo bai impedí ripitishon. Manera EXTRA a informá dia 6 di novèmber último, e ministerio a eksperensia ku a lòk tur informashon poniendo ku funshonarionan di e servisio mes no tin akseso na niun informashon. E back-up tambe tabata den mesun situashon. Manera EXTRA a informá tabata trata di un kaso di ‘ransomeware’. Esaki no ta nada mas un sistema kaminda malechornan ta hinka un ‘software’ maligno den sistema di kòmpiuter di e instansia ku ta blòkia e akseso na tur informashon. E instansia por haña akseso i dominio bek riba su informashon despues di paga un suma (ransome).

EXTRA a sigui chek tur siman ku minister di BPD sr. Armin Konket komo ku ta trata di un kaso ku meresé atenshon pa e empleadonan públiko sa ku nan informashon ta sigur i pa komunidat tambe pa haña e trankilidat ku ta tuma medida pa evitá ripitishon i asta kasonan mas serio.

Mas o ménos un siman despues e minister a indiká ku tin un komishon trahando i investigando e asuntu, pero simannan despues ainda no tin informashon si a haña sa kon ‘hackernan’ a logra drenta e sistema di gobièrnu ni kon ta bai hasi pa impedí posibel ripitishon. Hasiendo propio investigashon EXTRA a komprondé ku posiblemente lo ta trata di un fayo, den sentido un pago ku mester a tuma lugá pa lisensia pero ku no a sosodé òf a sosodé hopi lat loke lo por a pone seguridat di e sistema na prueba. Manera indiká e ministerio ta bisa ku nan ta investigando e kaso i komo tal no ta bisando muchu.

Na Aruba tambe a konstatá ku a hack e hospital di e isla. Den e kaso ei tambe a indiká ku lo ta trata di ‘ransomeware’.

A ‘hack’ ministerio di gobièrnu

SHARE

LEAVE A REPLY