WASHINGTON, MERKA, AFP.- Un persona a muri i un otro a resultá heridá den un protesta di Black Lives Matter na Louisville, den estado di Kentucky, segun indikashon di polis.
E insidente a sosodé djasabra den parke Jefferson Square den sentro di Louisville kaminda e manifestantenan ta reuniendo ya pa vários siman kaba pa protestá kontra asesinato di Breonna Taylor, un afroamerikano.
E morto di Taylor den mart a kontribuí ku un kampaña kontra rasismo i violensia polisial na Merka. E kampaña a wòrdu reforsá ku morto di George Floyd, un afroamerikano ku a muri despues ku polis a sofok’é durante su detenshon. El a grita vários biaha ku e no por hala rosea, kual a kombertí den motor di e kampaña kontra rasismo ku e ekstendé rònt mundu.
E alkalde di Louisville, Greg Fischer a bisa ku e ta “sumamente tristu” na momentu ku el a tende e notisia.
Promé ku e tiroteo, Fischer a pidi manifestantenan pa keda leu di e parke, despues ku e korant lokal Louisville Courier Journal a informá ku diferente grupo armá a plania pa konfrontá e manifestantenan.
Outoridat no a revelá detaye di e sirkunstansia di e manifestante su morto.
