SOUTHPORT, GRAN BRETANIA (AFP).- Enfrentamentu violento a tuma lugá ayera entre polis i manifestantenan na Southport, den nort di Inglatera, kaminda un atake ku kuchú durante di un lès di baile a kobra bida di tres mucha muhé.
Den kareda di 100 manifestante a enfrentá polis i a sende kandela na diferente parti. Videonan ku ta sirkulá riba retnan sosial ta mustra un vehíkulo polisial na kandela i manifestantenan tirando proyektilnan riba polis.
E enfrentamentu a kuminsá despues ku a bira konosí ku tin un di tres morto, un mucha muhé di nuebe aña, komo víktima dje atake di djaluna durante un evento di baile.
E dos otro víktimanan mortal tambe ta mucha muhénan di seis i shete aña. Ocho mucha a keda heridá, sinku di nan ta den kondishon krítiko, i dos adulto tambe ta den mesun kondishon.
Promé ku e insidente di ayera tabatin un vigilia den sentro dje lokalidat, kaminda sentenáres di hende a reuní pa rindi tributo na e víktimanan.
E promé minister di Reino Uní, Keir Starmer, a bishitá e sitio djamars i a bisa ku e tragedia “a mishi ku nèrvio” di hinter e pais.
Tabata djaluna último den oranan di mèrdia polis a keda atvertí ku un atakante a drenta un edifisio kaminda tabatin un kurso di baile pa mucha ku músika di Taylor Swift, i a kuminsá agredí e menornan. Djis despues a detené un hóben di 17 aña.
E strea Taylor Swift, aktualmente riba un gira mundial, a bisa di ta “kompletamente den shòk” pa loke a pasa, den un mensahe ku el a pone riba Instagram. “Nan tabata djis poko mucha den un lès di baile”.
