WILLEMSTAD.- Durante e investigashon ku tin andano di e pareha den e kaso di sekuestro, maltrato, violashon, intento di homisidio i ladronisia di un damita hulandes di 17 aña, a bin posiblemente 2 akusashon mas den nan kontra, di kual 1 ya ta kla.
Segun informashon konfidensial ku EXTRA ta disponé di dje, despues ku e pareha lo a kometé e echo horendo ku e damita hulandes, e pareha lo mester a persiguí un dama venezolano te den área di Bándabou.
Na momento ku e víktima a para ku su vehíkulo, e hòmber lo a baha chok’é i forsageá kuné i na final a logra bai ku su vehíkulo. Despues di e denunsia di e víktima, polisnan a haña e outo den un mondi.
Durante investigashon polis a konstatá algun prueba klave ku ta indiká ku ámbos sospechoso ta involukrá den e kaso aki tambe. Durante konfrontashon di foto, e víktima a rekonosé e sospechoso maskulino, pero no esun femenino.
Despues di e algun investigashon mas aleu a konstatá ku tin sufisiente indikashon ku e sospechoso femenino tambe a partisipá na e atrako i ladronisia di e dama venezolano di kual nan a bai ku su vehíkulo. Aparentemente e sospechoso maskulino a atmití e kulpa aki ora a konfront’é ku e akusashon.
Tin un di 3 kaso di kual ámbos sospechoso ta sospechá di dje, pero ku ainda e investigashon no ta kla.
Tur e kasonan ta den pleno investigashon.
Ta trata aki di e pareha un hòmber i un muhé ku dia 25 di ougùstùs último, a sekuestrá e damita hulandes.
E mardugá di e suseso alrededor di mitar di dos di mardugá e hobensita a wòrdu sekuestrá riba Caracasbaaiweg na altura di un trùk di pan. E sospechoso femenino a para e vehíkulo ofresé e damita left indikando na dje ku ta peligroso pa e ta su so riba kaya den e ora nan ei. Mirando ku ta un hende muhé, e damita a drenta den e vehíkulo sin sa ku tabatin un hende hòmber sintá patras. Na momento ku el a drenta e hòmber a kue choka bai kuné na dos diferente bankomátiko, i a oblig’é saka sèn for di tur dos mashin.
Unu den e bario di Jandoret i unu den bario di Buena Vista.
Nan a trata na diferente okashon di choke i despues ku nan a logra saka sèn for di e bankomátikonan nan a mara e víktima su man ku pia ku su panty i brazièr, pa despues tir’é for di baranka na e mirador mei mei di Kenepa chikí ku Kenepa grandi.
Despues ku e imágennan di kámara a bai rònt den tur medianan di komunikashon, kaminda por a mira kara di e hòmber, ámbos sospechoso a bai entregá pa responsabilisá nan mes pa nan aktonan ku ta enserá bastante akusashon pisá.
Durante interogashon e akusado femenino a akseptá ku el a duna e damita left pa bai lanta sèn bèrdat na bankomátiko, pero ta ninga di ta esnan ku a tir’é na laman.
E sospechoso maskulino si a akseptá praktikamente tur kos. Na total nan a lanta e miserabel suma di 475 florin di kual nan a usa pa kumpra kos pa nan baby, segun deklarashon. E akusado femenino ta un shofùr di bùs ku ta kore e área di Brievengat/ Bonam. Awor a bin mas akusashon den e pareha aki su kontra ku praktikamente ta solushoná.
