Ban hòfi Machi…esei ta loke Alirio Hueck mihó konosí komo Usi a lanta tende for di chikí. Machi tabata su wela ku tin un hòfi riba Commanchestraat. Einan for di chikí nan tabata bai pa duna bestia kuminda pero e hòfi tin muchu mas ku esei komo su historia. Carla Hueck-Martina i su kasá Alirio Hueck tin proyektonan interesante na Hòfi Machi. I nan a konta;
Fo’i chikí den hòfi…
“Mi a lanta muchu nèt dilanti di e hòfi i komo mucha mi tabata bai einan tur dia. Einan tabata bende awa tambe i te ainda tin un pos grandi di for di e tempu ei. Mi wela tabatin e hòfi i einan tabata kria bestia. E kos a keda den mi. Mi tabata sali for di skol i bai mesora hòfi. Mi wela a fayesé i algun tio di mi a keda ku e hòfi. Mi tionan a bira grandi i mi no tabata ke pa e hòfi bai atras. Mi a bolbe kuminsá limpia, planta i te awe e kos a keda asina”, Usi a konta. E hòfi ta mas òf ménos 1 hèktar di grandura i ta yen di bestia. Na momentu ku Usi a baha ku penshun, e kier sigui move i nada mihó ku move den hòfi, den mata i bestianan.
Trankilidat…
Usi a konta Djasabra ku ora e ta den Hòfi Machi e ta sinti un trankilidat masha dushi mes. “Mi ta sali for di trabou i bin ku doló di kabes i strès i mi ta yega ei den i tur kos a bai. Bo no por imaginá bu. Mi mes ta hasi tur kos aki den, mi mes ta atendé ku mi bestianan. E ta un trabou di un dia kompleto. Usi ta konsiente ku edat ta subi i físika ta lag’é poko na kaya pero te ainda kasi tur kos e mes ta hasi den e Hòfi.
Diferente bestia…
Tin kabritu, karné, patu, galiña gueni, pòwis, kalakuna, porko. E kabritunan ta keda distinguí den kabritu grandi i ‘dwerf geitjes’. E kabritunan ta basta mesklá i diferente tipo tin.
Malowa…
Banda di krio di bestia i un kurá yen palu grandi di entre otro fruta, tin un plantashon grandi di Malowa aki tambe. Malowa ta kuminda di bestia. E ta manera yerba ku ta krese hopi haltu, e por tapa kualke hende na haltura.
Plannan…
Nan ke lanta un Kinderboerderij na e hòfi pa muchanan òf si un hende ke hasi un fiesta di mucha, e ta bon biní. Tambe pa hasimentu di aña òf aktividatnan pa grandi. No ta permití fiesta grandi ku hopi bochincha pasobra nan ke e trankilidat keda.
Pasa konosementu over…
Te ainda e Hòfi tabata disponibel i habrí pa amigunan. Nan ta sinta einan hasi BBQ entre nan ku nan. Pa luna di yüli lo kuminsá bai un stap mas dilanti segun Carla. I poko poko lo wak pa muchanan bin i mas ainda ta den fakansi. Usi sa hopi di bestia i e por pasa e konosementu ei pa e muchanan. E muchanan por bin einan, mishi ku e bestianan, konosé kon ta kria i kuida nan. Por ehèmpel e diferensia entre un pòwis muhé i machu. Un pòwis machu den su temporada di “paring” su rabu ta bira masha largu i i ta keda di yanüari te ougùstùs asina i despues e rabu ta kai. E ta span e rabu pa asina hala atenshon di e pòwis muhé. Ora nan kaba di par, pone webu, e yunan ta keda kana tras di e mama. Esei ta algu remarkabel; den mundu di animal ta e hòmber ta mas bunita ku e muhé.
Merkado…
Teniendo na kuenta kon e desaroyo di plantashon lokal ta bayendo. Hopi hende ta planta i despues ta ofresé esaki na benta, nan tambe ke duna e posibilidat pa produktonan lokal por bai un biaha pa luna na Hòfi Machi i bende nan produktonan. I no solamente pa plantashon pero tambe nan ke pa den e merkado ei konsentrá riba kosnan lokal mas amplio manera arte. Pronto lo haña sa kua fecha e merkado lo tuma lugá.
Team building…
Carla Hueck-Martina ta profeshonal den entre otro ‘team building’ i komunikashon. E ta hasi esei hopi pa empresanan. Poko poko e ta bayendo direkshon di e Hòfi, kaminda tin dushi palu pa sinta bou di dje pa asina e hasi e komunikashon i ‘team building’ serka nan na hòfi Machi.
Bishita hòfi Machi…
E hòfi ta habrë pa tur hende pero preferibel traha sita promé. Hopi bia Usi ta bezig i no tur ora por atendé un hende sin sita. P’esei nan ta pidi pa traha sita promé. E hòfi tin un espasio ku dak, ku su kushina i wc kaminda por hasi uso di dje pa eventonan. Por tuma kontakto ku nan na 5100432/5614620
