Gobernado sra Lucille George Wout
WILLEMSTAD.- Den kuadro di selebrashon aña di rei, gobernado sra Lucille George Wout a habri palasio pa risibí invitadonan i asina brinda na okashon di aña di su mahestat rei Willem Alexander. Riba e patio di palasio di gobernado, sra George Wout a bisa ku ta tempu pa pone nos palabranan den akshon. “No ta basta ku un formalidat; ta un mandato pa nos tur pa traha huntu na desaroyo di nos pais den Reino, pa e bienestar di nos siudadanonan”, gobernado a bisa den su diskurso.
El a kuminsá su diskurso poniendo atenshon na e rekonosementu real “lintjes”. Ta un rekonosementu spesial pa e persona ku ta risibí un dekorashon a nòmber di su mahestat rei Willem Alexander. Lintjes ta bai pa e hende ku a kontribuí di manera eksepshonal na komunidat. E kontribushonnan por ta diferente tipo i no ta importante si e aktividatnan ta den linia ku maneho di gobièrnu. E esensia ta ku nan ta sirbi pa bienestar di komunidat, sin tene kuenta ku preferensia polítiko òf religioso.
Ta aktividatnan di i pa hende. Ta importante ku ta wak e aktividatnan aki. E rekomendashonnan pa dekorashon ta bin di komunidat mes; e balorashon ya ta eiden, I nan komo gobernantenan di pais ta enkargá pa di forma ofisial entrega e Lintje na nòmber di Rei.
Ta un kos bunita ku tur pais den Reino por reflehá su presensia na Dia di Rei. E dia aki ta fortalesé e sintimentu di unidat, tantu den nos propio pais Kòrsou, komo den Reino kompleto. “Den e tempu ku nos ta biba awor, nos mester e unidat ei”, gobernado a bisa.
E unidat ei ta loke a hasi yamada riba dje pa desenio kaba, di tur banda di osean. Esei a kuminsá for di e di dos guera mundial ora Kòrsou i Aruba tabata importante den provishon di kombustibel pa aliadonan. Resien nos por menshoná tempu di Covid kaminda por a hasi petishon riba e sosten mutuo. Awor tambe, tantu den Reino komo den e komunidat mundial, nos ta para dilanti di desafionan grandi.
Sra George Wout a sigui bisa ku desaroyonan geopolítiko ta afektá tur hende. No nesesariamente den forma di konflikto militar, pero sí den nivel polítiko ekonómiko. Ku e distansia di Merka for di Oropa a pone ku e paisnan den Oropa a bira mas dependiente di otro.
Pero tambe otro region no ta Sali liber for di e tenshonnan; inkluso nos region. Aunke nos ta biba riba un isla, nos realidat polítiko ta hopi mas kompleho. Tur pais ta konektá, sea nos ke òf no.
Den e konteksto aki, e lasonan históriko den Reino ta di gran balor. No solamente pa defensa físiko di teritorio di e Reino, inkluso e paisnan karibeño, sino tambe pa sostené otro den un mundu den moveshon, ku kompetensia i asta konflikto entre podernan grandi; den un sistema di dependensia mutuo, spesialmente den desaroyo ekonómiko, komersio, turismo i retonan di ICT.
Hustamente paisnan chikí manera nos den reino, tin interes grandi den e órden legal internashonal. E derechi di esun mas poderoso no mag di konta mas den e tempu aki, pero lamentablemente esaki ta e kaso ainda.
Gobernado a pidi pa no wak e desaroyonan den mundu solamente ku e aserkamentu di preokupashon i rísiko, pero ku bista di poder i oportunidat. Pasobra oportunidatnan tin sigur. Entre otro pa e retonan grandi riba tereno di klima i transishon di energia, Kòrsou tin un bon posishon.
“Nos lokalidat geográfiko i e fasilidatnan di haf ta un bentaha. E ta pidi konvikshon i entusiasmo pa akshoná, i persistensia pa logra algu huntu. Pero pa esaki, nos mester pone e gran meta dilanti nos, no solamente interes personal òf benefisio inmediato, sino e interes general; kiko nos por logra manera pais, den kolaborashon ku nos sosio den e Reino? Pa esaki, nos mester uni forsa i kapasidat den lasonan den Reino. Mi ta kere den esaki”, segun gobernado.
Pronto lo sinta un parlamentu nobo i tambe un gabinete nobo. Tantu e miembronan di parlamentu komo e ministernan lo presta huramentashon serka gobernado.
Hustamente na e momentu aki mas ku nunka mester pone palabra den akshon. No ta basta ku un formalidat; ta un mandato pa nos tur pa traha huntu na desaroyo di nos pais den Reino, pa e bienestar di nos siudadanonan.
“Mi tin konfiansa ku nos por logra esaki. Si nos ta dispuesto na pasa over di nos propio sombra i rekonosé unda mester yuda otro. E ora lo tin speransa pa futuro’, sra George Wout a bisa den su diskurso.
