Stichting Uniek Curaçao a keda lanta na 1993, kasi di 30 aña pasá pa Theo van de Giessen. Su presidente aktualmente, pa sigur mas ku 10 aña ta Frensel Mercelina, kende a konta nos di Djasabra di nan meta, vishon i plannan ku tin na bista. Dos aña despues ku Uniek Curaçao a lanta, Frensel a djòin e fundashon. Uniek Curaçao a kuminsá trese dilanti e partinan úniko di Banda Bou, despues ku nan a asistí na e kurso di CTB. Frensel i otro grupo a partisipá na e mesun kurso di CTB i nan a konsentrá riba Banda Riba. Nan a bin den kontakto ku Uniek Curaçao, ora a pone un eksposishon di potrèt i a fia e stèntnan pa pone potrèt riba dje serka Uniek Curaçao. Theo a mira e potrètnan i nan a pidi pa djòin otro. Di e dos gruponan ei a keda solamente Frensel i Theo van de Giessen.
Meta
Uniek Curaçao su meta ta pa hasi e abitantenan di Kòrsou konsiente di e balornan úniko ku naturalesa ku Kòrsou tin pa ofresé. Tambe eduká e pueblo tokante di e balornan aki, historia di nos isla, kultura i tur kos di naturalesa. Ta trese dilanti e parti biológiko i asina krea un dragvlak bou di e pueblo pa asina nan haña balor di nan naturalesa i asina na su turno protehé. Atraves d añanan nan a logra hopi. Ora nan a kuminsá nobo nobo ta masha poko yu di tera tabata kana mondi pero awendia Kòrsou ta dòrná ku trailnan pa kana. I kualke trail bo skohe ta topa hende di Kòrsou ta kana. Frensel ta kòrda 2 aña pasá nan a bai kana mainta i a topa un grupo di damanan so yu di Kòrsou. Un di e damanan di Kòrsou tabata guia e grupo ei. Esaki ta un indikashon ku e loke nan a lanta pe a pega. Esaki ta proba ku nan ta logrando nan meta. Por mira ku e konsientisashon pa ku naturalesa a krese masha hopi mes bou di e pueblo. Por ehèmpel Amigu di Tera tambe a lanta kasi mesun temporada i a djòin ku nan tambe. I asina awendia ku e pueblo ta konsiente sigur hopi mas konsiente ku mester protehá naturalesa.
Trabou krea
Frensel a bisa ku ta masha importante pa menshoná ku hopi grupo di trabou a keda kreá den turismo dor ku e yunan di tera a mira ku por bende naturalesa ku e turista. E turista no ta bin pa solo ku laman so pero Kòrsou tin algu úniko pa mustra nan ku ta nos naturalesa.
Kuida i protehá nos naturalesa
Tur a kamindanan ku tin pa kana dor di naturalesa ta aksesibel pa un i tur. Frensel a reakshoná riba e punto si nos hendenan ta kana dor di e áreanan aki sin kousa daño na nos naturalesa. El a bisa ku e hendenan ku ta bai kana, i ta hasi uso di e kamindanan dor di naturalesa pa distraé nan mes, no ta hasi daño. Mayoria hende ku ta hasi daño ainda ta esnan ku ta basha sushi. E hendenan ainda no a haña e konsientisashon ku tin di protehá nos naturalesa. E hendenan ku ta kana mes ta tene e lugánan na òrdu i asta ta pone Uniek Curaçao na altura si nan mira algu for di sla òf shushi. E hendenan ku ta bai kana ta disfrutá i kuida nos naturalesa.
Kua área mas gustá
Riba e pregunta kua parti di Kòrsou nos hendenan ta gusta mas, Frensel a bisa ku Banda Bou e hendenan ta bishitá mas pero esei ta debí ku e área ei semper a keda promové mas tantu. Pero último añanan Bándariba a haña hopi akohida serka e pueblo. Por mira por ehèmpel na Sta. Catharina, Koral Tabak, St. Joris ta áreanan ku ta hopi bishitá dor di e pueblo i prinsipalmente Janthiel, Dunki ta áreanan ku tur dia atardi bo ta haña hendenan ta kana pasobra e ta serka di kas. Den siman e áreanan ei ta hopi bishitá i mainta tempran por topa hopi hende ta kana. I wikènt ta bai mas e área pabou.
Rekonosementu
Uniek Curaçao a haña e rekonosementu ku e meresé. Frensel ta kòrda mas òf ménos 11 aña pasá ku nan a risibí e premio di Natuur en Cultuur prijs di Prinsbernhard Cultuurfonds. Esaki tabata algu grandi pa nan i a duna un estímulo pa sigui traha den e mesun direkshon.
Mas boluntario
Uniek Curaçao ta traha ku boluntario. Frensel a bisa ku nan ta lora ku e kantidat ku nan tin pero semper mas hende ta bon biní pasobra e trabounan ta hopi. Prinsipalmente mantenshon di e kamindanan di kana i despues di áwaseru nan ta sera ku palunan. I hopi hende ku ta kana ta bai ku un skèr chikí i kòrta e puntanan ku ta krese i asina tene e área di kana habrí.
Areanan di maneho
Uniek Curaçao tin diferente área ku nan ta manehá ofisialmente. Tin por ehèmpel huntu ku CTB nan ta manehá Dunki,
Caracasbaai i Beeckenberg nan ta mantené tambe pero no ta manehá.
Tin área ku nan no tin bou di maneho pero si ta pèrkurá pa nan manera Caracasbaai nan ta pèrkurá pa tene limpi i p’esei a pone asta bankinan einan.
Tambe nan tin St. Joris ku no ta kai bou di nan pero nan ta mantené.
Zuikertuintje nan ta tene limpi, Rooi Rincon, Malpais, Saliñanan di Jan Kok, Rif St Marie su saliñanan, Kabouterbos ounke ta Carmabi ta maneh’é.
Uniek Curaçao ta mantené, Ascencion, Patrick. Ascencion Uniek Curaçao tin un akuerdo di maneho miéntras ku Patrick ta bou di pensioen fonds pero nan ta mantené tòg limpi. Na Boka Ascuncion por ehèmpel tin hopi turtuga ta bin.
Shushi di otro pais na Kòrsou
Ora mira e limpiesanan ta tuma lugá por mira hopi shushi ta keda rekohé. Frensel a bisa ku Kòrsou no tira shushi den laman. E shushinan ku ta haña den laman awendia ta bin di botonan. Tin shushi tambe ku ta bin di Suramérika ku ta laba bin te nos awanan. Nan ta topa e palu balsa ku ta un palu liviano i ta top’é na Noorkant. Asta ta haña e pènchi klabá den dje pasobra el a forma parti di armada di jungel i eseinan a bin di Suramérika. Meskos ku e pipita djuku tambe ta haña hopi na Noorkant. Nan ta krese kantu di riu i huntu ku nan ta bin tur sorto di shushi mas. Esaki por konkluí ku e shushinan kantu i den laman na Kòrsou no ta di Kòrsou.
Fondo
Uniek Curaçao ta dependé di fondo i supsidionan. Den e 28 aña ku nan tin ta lucha nan ta purba tene nan gastunan mas abou posibel. Nan tin spònsernan ku ta kere den Uniek Curaçao. Nan tin proyektonan ku spònsernan ta duna sèn pe. I di nan parti semper Uniek Curaçao ta mustra e spònser kon nan ta usa e sèn. Tambe nan ta traha k hopi boluntario i dor di esei e gastunan di e fundashon ta keda abou. E problema ta ku tin bia mester warda ora sènnan drenta pa por hasi proyektonan. Nan no ta fia pero ta drei ku loke nan tin.
Eskurshon na grupo i skolnan
Frensel a splika ku nan ta duna eskurshonnan na gruponan. En partikular hendenan lokal nan ta drei kuné mas tantu. Tin bia turistanan ta yama pero Uniek Curaçao ta manda nan pa e kompanianan ku ta duna e tipo di eskurshonnan aki. Si ta djis un kaminata Uniek Curaçao mes por hasié. I asina tambe nan por haña un tiki entrada ku ta bai den kaha pa sigui hasi kosnan na benefisio di nos naturalesa.
Kaminata di búskeda i eksámen na skolnan
Skolnan tambe ta bin serka nan di Uniek Curaçao na e áreanan di naturalesa. Resien nan a hasi un eskurshon i un kaminata di búskeda ku muchanan di grupo 7 i 8. E muchanan mester a buska algun lugá a base di plachi i kontestá pregunta. E tabata manera un bingo i e muchanan a gusta e kos ei masha hopi. I tur esaki, e preguntanan i e karchi di bingo pa e skolnan ta Uniek Curaçao mes ta traha nan. Den pasado nan tabatin mas programa na skolnan. Antes tur siman nan tabata bai den naturalesa ku e muchanan di grupo 8 i nan ta haña un kaminata di búskeda pa nan konosé nos naturalesa. Pero despues no tabatin fondo mas pa paga bùs pa e muchanan i asina el a stòp. Asta eksámen di Biológiko pa hóbennan di klas 4 di VSBO den naturalesa Uniek Curaçao tabata enkargá kuné.
