Kaya Kallas, hefe di prensa diplomasia di Union Europeo
BRUSSEL (AFP).- Union Europeo a duna di konosé di lo hasi un apelashon riba Israel pa mehorá e situashon humanitario den Gaza, despues di revisá un akuerdo di kooperashon i a konkluí ku e pais no ta kumpli ku su obligashonnan den materia di derechinan humano.
“Nos lo drenta den kontakto ku Israel pa presentá loke nos a deskubrí i mira kon nos por mehorá e situashon”, segun hefe di prensa di diplomasia di Union Europeo, Kaja Kallas.
“Si e situashon no mehorá, nos lo mester diskutí medidanan adishonal”, el a agregá.
E tema a forma parti di agènda di un reunion di ministernan di relashonnan Eksterior di Union Europeo, den Brussel.
Union Europeo a start un revishon dje akuerdo di asosiashon firmá ku Israel, segun un artíkulo ku ta eksigí rèspèt pa derechinan humano. E revishon ei a konkluí ku e komportashon di Israel den Gaza tabata den konflikto ku su obligashonnan.
E teksto ta menshoná e blokeo di yudansa humanitario pa Gaza, e kantidat haltu di sivilnan ku ta pèrdè nan bida i e mudansa masivo di personanan kousá pa e guera.
Kallas a presentá e resultadonan dje revishon na e diplomátikonan ayera. “Nos preokupashon prinsipal ta e distribushon di yudansa humanitario. Nos ta mira e yudansa akí akumulá na e fronteranan, pero nan no ta yega serka e hendenan mes” segun el a komentá.
Vários pais, inkluso Spaña, a pidi Union Europeo pa para e akuerdo ei. Pero e desishon ei mester tin unanimidat entre e Estadonan miembro di Union Europeo, esenario ku diplomátikonan for di un prinsipio a bisa ku ta praktikamente imposibel.
