BRUSSEL, Belgika (AFP).- Despues di un siman di deliberashon i ignorando e menasanan di Donald Trump, Komishon Europeo ayera a anunsiá di lo imponé un multa di 2.950 mion euro (kasi 3.500 mion dòler) riba Google. E ehekutivo europeo a konsiderá ku e teknológiko gigante norteamerikano a abusá di su posishon dominante den e sektor di publisidat ‘on-line’.
E sanshon akí konosí komo Adtech, ku Google dirèkt a anunsiá di lo apelá, tabata kologá den laira. E komishon den 2023 a menasá ku eksigí pa eliminá parti di aktividatnan dje grupo pa e parti di publisidat ‘on-line’, algu ku nan no a hasi. E anunsio dje sanshon akí kontra dje gigante norteamerikano a retrasá na kuminsamentu dje siman akí, na momento di tenshonnan entre Union Europeo i Merka,.
Dia 26 di ougùstùs, Donald Trump di manera enérgiko a ataká paisnan i organisashonnan ku ta regulá e sektor teknológiko, menasando ku impuesto i restrikshonnan den eksportashon. Aunke e no a menshoná di forma direkto Union Europeo, echo ta ku esaki ta disponé dje arsenal hurídiko mas potente di mundu pa regulá e sektor digital, loke ta alimentá e debatenan na Europa riba e riesgo di represaya den kaso di sanshon kontra di empresanan norteamerikano.
Union Europeo a kontestá di tin “e derecho soberano” pa regulá teknologia.
Den un deklarashon na AFP, Google a kritiká di forma severo e sanshon dje komishon. “E desishon di Komishon Europeo riba nos servisionan Adtech ta robes i nos lo apelá. “Ta dal nos un multa no hustifiká, ademas di kambionan ku lo afektá míles di empresa europeo, ya ku lo resultá mas difísil pa nan gana plaka”, segun Lee-Ann Mulholland, vise presidente di Google enkargá ku asuntunan hurídiko.
