BRUSELAS, AP.- E ministernan di Eksterior di Union Europeo a manifestá nan sosten na e akuerdo nuklear ku Iran, despues ku e Repúblika Islámiko a kuminsá ku labornan di enrikesimentu na Fordo. Esaki ta un desafio nobo ku por nifiká fin di e akuerdo internashonal.
E hefe di eksterior di UE, Federica Mogherini a bisa ku e ministernan “ta respaldá e akuerdo ku ainda ta krusial pa nos seguridat. Nos lo sigui traha na fabor di un implementashon kompleto di e akuerdo”.
Algun pais di UE a firma e akuerdo nuklear na aña 2012, i tin un kombersashon pendiente pa djaluna. E reunion lo trata e pasonan ku mester tuma despues ku e monitòr nuklear di Nashon Uní reportá su último deskubrimentunan.
“Nos kier mantené e akuerdo, pero Iran mester mantené su kompromiso. Si resultá otro nos lo usa tur mekanismo stipulá den e akuerdo”, asina e minister di Eksterior di Alemania, Heiko Maas a bisa.
UE ta konsiderá e pakto nuklear komo un komponente klave di seguridat mundial i regional i kier mantené esaki implementá, spesialmente desde ku presidente Donald Trump a saka Merka for di e akuerdo mas di un aña pasa, i apliká sanshonnan ekonómiko kontra Iran.
