Update: A alerta koleganan na Aruba kaba

WILLEMSTAD.-E tim di kalamidat enkabesá pa Lesley Fer ta den estado di alerta pa e derame di petroli ku a tuma lugá na estado Falcon na Venezuela. Manera EXTRA a informá un ratu pasá instansianan internashonal i lokal ta siguiendo koriente di laman pa wak ki akshon mester tuma pa evitá daño ku e derame aki lo por kousa na islanan ABC. Lesley Fer den deklarashon na EXTRA a duna di konosé ku tur kos ta indiká ku pa awor aki e menasa ta mas bien riba Aruba i ménos na Kòrsou.

Fer a duna di konosé ku for di momentu ku e derame di petroli na estado Falcon a bira konosí mesora nan e sentro di kordinashon na Mahuma a informá nan di esei. Ya kaba a instituí un grupo di app speshal pa medio di kua tur esnan konserní lo keda den kontakto estrecho ku otro manera outoridatnan marítimo, kapitan di haf, brantwer, kuerpo polisial, wardakosta i otronan. Den kaso di kualke situashon ku por menasa Kòrsou mes ora e tim aki ta aktivá i tuma e akshonnan nesesario.

Pues tim di kalamidat a haña e señal i nan a aktivá i kuminsá tene otro informá. Meteo tambe ta forma parti di e grupo i ta Meteo ta esnan ku ta dunando informashon riba e koriente di bientu i di laman pa asina e tim por kalkulá e nivel di riesgo ku Kòrsou ta kore debí na e derame. For di e informe ku Meteo a presentá por mira ku aktualmente e koriente por hiba e derame basta sùit di Kòrsou. Danki na e koperashon den reino a informá koleganan na Aruba di e situashon ku a konstatá. Pa Kòrsou e menasa ta limitá, pero tòg mester keda vigilá e situashon pasobra e por tin riesgo pa bida bou di laman i tambe paranan ku ta bula na kosta. Nan ta sigui vigilá e situashon hopi djaserka.

 

Koriente di laman ta mustra mas riesgo pa Aruba

WILLEMSTAD.-Na Kòrsou tambe ta monitor un derame di petroli ku a tuma lugá na Venezuela den último dianan. Informashon internashonal ta mustra ku e derame aki a tuma lugá den e área di Boca de Aroa i Tucacas na estado Falcon. E orígen lo ta i e refineria El Palito. Sistemanan di monitor na nivel internashonal ta atverti e islanan Kòrsou, Aruba i Boneiru ta den e liña di por sufri daño.

EXTRA a trata na drenta den kontakto ku sr. Fer di Büró di Kalamidat pero nos no a logra haña kontakto kuné. Sinembargo siguiendo ku nos investigashon EXTRA a tuma nota ku instansianan lokal a i ta informashon tur esnan konserní di e derame di petroli na Venezuela i su posibel impakto pa e islanan ABC.

E direktor di outoridat marítimo di Kòrsou no por a duna informashon, konsiderando ku e ta ku fakansi ainda, sinembargo a informá ku e kaso aki ta unu ku meresé ku ta sigui monitor kon e ta desaroyá. E tambe a dirigí EXTRA den direkshon di e Büró di Kalamidat pa detayenan. Lo mester ta asina ku e organisashon di kalamidat di pais lo tin un plan i na e momentu oportuno lo indiká na tur e partidonan kiko ta e akshonnan ku mester tuma i sigui.

Mapa koriente di laman

Informashon internashonal ta mustra ku e islanan ABC bèrdat ta kore un riesgo di keda afektá, pero pa awor aki mester keda monitor e zeta via di Wardakosta i otronan ku ta sigui esaki. Tin indikashon ku Kòrsou lo no ta kore muchu peliger, pero e ta keda un potensial riesgo den e área aki.

Buskando mas leu EXTRA a topa ku un mapa ku ta mustra koriente di laman i konosedónan di e materia ta splika ku tin hopi probabilidat ku e mancha di zeta lo pasa na sùit di Kòrsou, pero pa Aruba si e por ta net un poko mas delikado pues mester vigilá e situashon bon.

 

LAGA UN KOMENTARIO

Please enter your comment!
Please enter your name here