MONTEVIDEO, AP.- E gobièrnu di Uruguay a rechasá un petishon di Merka pa ekspulsá “algun diplomátiko ruso” di su teritorio, segun informashon di e página ofisial di presidensia uruguayo.
E solisitut aki a wòrdu realisá den un reunion bilateral ku a tuma lugá dia 14 na Lima durante kumbre di Organisashon di estadonan Amerikano (OEA), i a wòrdu rechasá pa kansier Rodolfo Nin Novoa. “Uruguay ta un pais soberano ku ta fiha su propio polítika relashoná ku sobrá parti di mundu”, segun indikashon di e minister.
Nin Novoa a agregá ku “Uruguay a rechasá e posibilidat aki total” i ku personalmente el a tuma loke a pasa “hopi na malu” konsiderando ku e ta “un pedido deskará”. El a sostené ku e petishon tabata verbal.
E pedido, a wòrdu hasí “a wòrdu hasí reflehando loke ta pasando ku algun pais den Europa, komo represaya di loke a pasa ku e eks spion ruso na Inglatera”.
E kansier a bisa ku e petishon di e gobièrnu di Merka a sorprend’é pasó esaki no ta algu ku ta pasa normalmente.
The Associated Press a pidi un komentario di Departamento di estado na Washington sin haña esaki mesora.
Pablo Castro, e persona enkargá ku prensa den embahada di Merka na Montevideo, a bisa ku e sede diplomátiko aki no tin ningun komentario pa realisá relashon ku e kaso.