Edifisionan den e kapital Khartoum, ku a sufri dañonan severo den e guera entre ehérsito dje pais i grupo di paramilitarnan. Desena di míles di hende a pèrdè nan bida den e guera na Sudan.
BERLIN, Alemania (AFP).- Komunidat Internashonal a primintí pa rekoudá den kareda di 1.500 mion euro (1.800 mion dollar) na yudansa humanitario pa Sudan, ku ta drenta su di kuater aña di un guera ku a hinka gran parti dje poblashon den miseria.
E guera entre ehérsito i paramilitarnan di Forsa di Apoyo Rápido (FSR) a okashoná desena di míles di morto, a kore ku mas di 11 mion persona i a hinka vários region dje pais den un situashon kaminda ku kuminda a bira skars.
“Awe ta kumpli tres aña ku e guera a kuminsá. Ta trata di algu trágiko den un konflito ku a destroá un pais i a provoká e krísis humanitario mas grandi na mundu”, segun Guterres di Nashonnan Uni. “E konsekuensianan no ta keda limitá na Sudan. Nan ta destabilisá hinter e region. Ta un pesadia ku mester kaba”, segun el a agregá den un mensahe dirigí na partisipantenan di un konferensia den Berlin.
E hefe di Nashonnan Uni a bolbe hasi un yamada na esnan den guera pa “stòp ku e konflikto” i tambe a hasi un yamada na komunidat internashonal pa “mobilisá” pa duna yudansa humanitario.
E minister aleman di Asuntunan Eksterior, Johann Wadeul, den e sifra primintí di parti di donantenan a tuma nota di “un señal positivo” pa loke ta e yudansa humanitario. Pero pa e sekretario general athunto di Nashonnan Uni pa Asuntunan Humanitario, Tom Fetcher, “nos tin meser di 2.200 mion dollar” ku ta den kareda di 1.800 mion euro, pa e aña aki.
E reunion di Berlin a reuní e gobièrnunan, agensianan humanitario, organisashonnan di sosiedat sivil, pero sin partisipashon di e dos partinan ku ta den e guera.
